ఉద్దానం నీటి ప్రాజెక్టు ప్రారంభానికి ఏర్పాట్లు - రేపే ముఖ్యమంత్రి చేతుల మీదుగా

Uddanam Project Opening Program Arrangements : శ్రీకాకుళం జిల్లాలో ఉద్దానం నీటి ప్రాజెక్టు ప్రారంభ కార్యక్రమానికి ఏర్పాట్లు శరవేగంగా కొనసాగుతున్నాయి. కంచిలి మండలం మకరాపురం గ్రామంలో 700 కోట్ల రూపాయలతో నిర్మించిన ఈ ప్రాజెక్టును సీఎం జగన్​ మోహన్​ రెడ్డి గురువారం ప్రారంభించనున్నారు. అయితే ఈ కార్యక్రమం కోసం చేస్తున్న ఏర్పాట్లను జడ్పీ చైర్​ పర్సన్​ పిరియా విజయ సాయిరాజ్​, మాజీ ఎమ్మెల్యే పిరియా సాయిరాజ్​, ఎమ్మెల్సీ నర్తు రామారావు పరిశీలించారు. 

ఈ సందర్భంగా వారు మాట్లాడుతూ ఉద్దానం పరిధిలోని కిడ్నీ సంబంధిత వ్యాధిని అరికట్టేందుకు వైసీపీ ఎన్నికలకు ముందు హామీ ఇచ్చిందని గుర్తు చేశారు. అప్పుడు ప్రజలకు ఇచ్చిన హామీ మేరకే ఇప్పుడు ఉద్దానం నీటి ప్రాజెక్టు నిర్మాణం పూర్తి చేసి ప్రారంభిస్తున్నట్లు వివరించారు. అంతేకాకుండా పలాసలో కిడ్నీ రీసెర్చ్​ సెంటర్​ను కూడా ఏర్పాటు చేసినట్లు గుర్తు చేశారు. ఈ నీటి ప్రాజెక్టును ఏర్పాటు చేసి పూర్తి చేయడం వల్ల ఉద్దానం ప్రజలు ప్రభుత్వానికి రుణపడి ఉంటారని అభిప్రాయం వ్యక్తం చేశారు.