Student Attack on Principal: పరీక్షల్లో డీబార్​.. ప్రిన్సిపల్​పై బ్లేడ్​తో విద్యార్థి దాడి..

Student Attack on College Principal : తనను పరీక్షలు రాయనీయకుండా డీబార్​ చేయించాడని ప్రిన్సిపల్​పై ఓ విద్యార్థి దారుణానికి ఒడిగట్టాడు. ఏకంగా ప్రిన్సిపల్​ను హత్య చేసేందుకు యత్నించాడు. దానికి తగ్గట్లు ప్రణాళిక రచించుకుని ఒక్కసారిగా ప్రిన్సిపల్​పై దాడికి దిగాడు.  అప్రమత్తమైన ప్రిన్సిపల్ తప్పించుకున్నాడు. ఈ ఘటన ప్రకాశం జిల్లాలో చోటు చేసుకుంది. పూర్తి వివరాల్లోకి వెళితే..

గిద్దలూరు పట్టణంలోని సాహితీ జూనియర్​ కళాశాలలో పబ్లిక్​ పరీక్షలు రాసేందుకు ఇంటర్​ విద్యార్థి హాజరయ్యాడు. పరీక్ష రాసే సమయంలో కాపియింగ్ చేసేందుకు యత్నించగా స్క్వాడ్​ సిబ్బంది గుర్తించి డీబార్​ చేశారు. అది అవమానంగా భావించి మనసులో పెట్టుకున్న విద్యార్థి.. దానికి కారణం ప్రిన్సిపలే అని భావించాడు. అతని వల్లే తన భవిష్యత్​ నాశనం అయ్యిందని కోపం పెంచుకున్నాడు. ఎలాగైనా ప్రతీకారం తీర్చుకోవాలని పన్నాగం పన్నాడు. ప్రిన్సిపల్​పై దాడి చేసేందుకు నిర్ణయించుకున్నాడు. ఇక అంతే పక్కా ప్రణాళికను రచించాడు. 

గురువారం సాహితీ జూనియర్ కళాశాల ప్రిన్సిపల్ కొండారెడ్డి గొంతును బ్లేడుతో కోసేందుకు ప్రయత్నం చేశాడు. అప్రమత్తమైన కొండారెడ్డి తన కుడి చేతిని అడ్డుపెట్టాడు. ఈ దాడిలో గొంతుకు, చేతికి గాయాలయ్యాయి. అది గమనించిన స్థానికులు కొండారెడ్డిని దగ్గర్లో ఉన్న ఆసుపత్రికి తీసుకెళ్లారు. చికిత్స అందించిన వైద్యులు ప్రాణాపాయం తప్పిందని చెప్పారు. విషయం తెలుసుకున్న పోలీసులు దాడికి పాల్పడ్డ విద్యార్థిని అదుపులోకి తీసుకున్నారు. అలాగే అసుపత్రికి వెళ్లి ప్రిన్సిపల్​ను అడిగి వివరాలు తెలుసుకున్నారు. పోలీసులు కేసు నమోదు చేసి దర్యాప్తు చేస్తున్నారు.