ముందస్తు సంక్రాంతి - కళాశాలల్లో విద్యార్థుల సందడి చూడతరమా!

Sankranthi Celebrations in AP : రాష్ట్రంలో ముందస్తు సంక్రాంతి పండుగను వివిధ కళాశాల్లో ఘనంగా నిర్వహించారు. గుంటూరులోని మలినేని లక్ష్మయ్య కళాశాల, విజయనగరంలోని డెంకడలో లెండీ ఇంజనీరింగ్​ కళాశాల, ఏల్లూరు జిల్లాలోని తపన ఫౌండేషన్​ సహకారంతో జేఆర్​జీ కమ్యూనికేషన్​ నెట్వర్క్​ ఆధ్వర్యంలో ఘనంగా జరుపుకొన్నారు. నిర్వహకులు తెలుగు సంప్రదాయాలను గుర్తు చేస్తూ వివిధ కార్యక్రమాలను నిర్వహించారు. ఈ కార్యక్రమంలో విద్యార్థులందరూ ఎంతో చురుగ్గా పాల్గొన్నారని పేర్కొన్నారు. గుంటూరు మలినేని లక్ష్మయ్య కళాశాల్లో జరిగిన ముందస్తు సంక్రాంతి సంబరాలకు ముఖ్యఅతిథిగా బీజేపీ రాష్ట్ర అధ్యక్షురాలు పురందేశ్వరి హాజరయ్యారు.

కళాశాల విద్యార్థులు తెలుగుదనం ఉట్టిపడేలా సంప్రదాయ వస్త్రాలను ధరించి, సాంస్కృతిక కార్యక్రమాలు నిర్వహించారు. ఈ సందర్బంగా రంగురంగుల ముగ్గులు, భోగి మంటలు, కోడి పందాలు, గంగిరెద్దుల ప్రదర్శనలతో కళాశాల ఆవరణమంతా పండుగ వాతావరణం నెలకొంది. ముందస్తు సంక్రాంతి పండుగ కార్యక్రమంలో విద్యార్థులు కోలాటం ఆడుతూ, పాటలు పాడుతూ, నృత్యాలు చేయటం చాలా ఆనందంగా ఉందని పేర్కొన్నారు. విద్యార్థులు సంబరాల ఆద్యంతం కేరింతలు కొడుతూ ఆనందంగా గడిపామని తెలియజేశారు.