Plastic Ban in Annavaram Temple: అన్నవరంలో ప్లాస్టిక్ నిషేధం.. కట్టుదిట్టంగా తనిఖీలు..

Plastic Ban in Annavaram Temple: కాకినాడ జిల్లా అన్నవరం సత్యనారాయణ స్వామివారి దేవస్థానంలో ప్లాస్టిక్ నిషేధాన్ని అధికారులు పకడ్బందీగా అమలు చేస్తున్నారు. ఈ రోజు నుంచి కొండపైన ప్లాస్టిక్ నీటి సీసాలు, ప్యాకెట్లు, గ్లాసులు విక్రయించడాన్ని పూర్తిగా నిషేధించారు. కొండపై దుకాణాల్లో ప్లాస్టిక్ వాటర్ బాటిల్ స్థానంలో గాజు, మొక్కజొన్న గింజలతో తయారు చేసిన నాన్ ప్లాస్టిక్ వాటర్ బాటిల్స్​లో మాత్రమే నీటిని విక్రయించేందుకు దుకాణదారులకు.. అధికారులు అనుమతించారు. టీటీడీలో మాదిరిగా.. గాజు సీసాలో నీటిని రూ.60లకు విక్రయించనున్నారు. వినియోగం తర్వాత ఖాళీ గాజు బాటిల్​ను ఏ దుకాణంలో ఇచ్చినా రూ.40 తిరిగి ఇస్తారు. టీటీడీలో ప్రస్తుతం ఈ విధానమే అమలులో ఉంది. అదేవిధంగా నాన్ ప్లాస్టిక్ బాటిల్​లో రూ.40లకు నీరు అందించేందుకు అనుమతించారు. భక్తులు కొండపైకి ప్లాస్టిక్ వాటర్​ బాటిల్స్ తీసుకురాకుండా అధికారులు కట్టుదిట్టంగా తనిఖీలు చేస్తున్నారు. ఈ క్రమంలో కొంతమంది భక్తులు తమతోపాటు తీసుకుని వచ్చిన ప్లాస్టిక్ వాటర్ బాటిల్స్​ను స్వచ్ఛందంగా కొండ దిగువన టోల్ గేట్ వద్దే పడేస్తున్నారు.