High Court Adjourned Ex Minister Narayana Ring Road Case Hearing: మాజీ మంత్రి నారాయణ ఇన్నర్​ రింగ్​ రోడ్​ కేసు.. విచారణ శుక్రవారానికి వాయిదా

High Court Adjourned Ex Minister Narayana Ring Road Case Hearing: మాజీ మంత్రి నారాయణ ఇన్నర్​ రింగ్​ రోడ్​ కేసులో దాఖలు చేసిన పిటిషన్‌పై విచారణను హైకోర్టు వాయిదా వేసింది. నారాయణ పిటిషన్‌ను మరో బెంచ్‌కు బదిలీ చేయాలని న్యాయమూర్తి ఉత్తర్వులిచ్చారు. అమరావతి ఇన్నర్‌ రింగ్‌ రోడ్డు కేసులో విచారణకు హాజరుకావాలంటూ.. నారాయణకు సీఐడీ నోటీసులు జారీ చేసింది. ఈ నోటీసులపై నారాయణ హైకోర్టును ఆశ్రయించారు. ఆరోగ్య కారణాల రీత్యా విచారణకు గుంటూరు రాలేనని పిటిషన్‌లో పేర్కొన్నారు. ఇంటి వద్దే విచారించేలా సీఐడీని ఆదేశించాలని హైకోర్టును కోరారు. 65 ఏళ్లు పైబడిన వారి విషయంలో సుప్రీంకోర్టు నిబంధనలను నారాయణ ప్రస్తావించారు. ఈ వ్యాజ్యంపై విచారణ జరిపిన ధర్మాసనం.. పిటిషన్‌ను మరో బెంచ్‌కు బదిలీ చేయాలని ఉత్తర్వులిస్తూ  విచారణను శుక్రవారానికి వాయిదా వేసింది.

నారాయణకు నోటీసులు: ఈ రోజు విచారణకు హాజరు కావాలని ఇన్నర్‌ రింగ్‌ రోడ్డు కేసులో మాజీ మంత్రి నారాయణకు సీఐడీ అధికారులు నోటీసులు అందించిన విషయం తెలిసిందే. లోకేశ్​కు నోటీసులు అందించిన అధికారులు.. నారాయణకు కూడా అందించి.. ఇద్దరినీ కలిపి విచారించాలని సీఐడీ అధికారులు అనుకున్నారు.