Farmers Protest: రహదారిపై రైతుల ధర్నా.. ఎంపీ బ్రహ్మానందరెడ్డి కాన్వాయ్‌ను అడ్డుకొని

Farmers Protest: నంద్యాల జిల్లా కానాలలో.. రైతుల ఆందోళన ఉద్రిక్తతకు దారి తీసింది.  నంద్యాల-జమ్మలమడుగు మధ్య కొత్తగా నిర్మించనున్న.. జాతీయ రహదారికి వ్యతిరేకంగా రైతులు రోడ్డెక్కారు. నూతనంగా నిర్మించనున్న నంద్యాల-జమ్మలమడుగు జాతీయ రహదారి(167 కె) అలైన్​మెంట్( రూపకల్పన) మార్పు చేసి పేద రైతుల పొలాల్లో రోడ్డు వేసే నిర్ణయాన్ని ఉపసంహరించుకోవాలని డిమాండ్​ చేశారు. ఈ క్రమంలో రహదారిపై వెళుతున్న నంద్యాల పార్లమెంటు సభ్యుడు పోచా బ్రహ్మానందరెడ్డి వాహనాన్ని అడ్డుకున్నారు. 

ఎంపీ కాన్వాయ్​ ముందు రైతులు, సీపీఎం రైతు సంఘం నాయుకులు బైఠాయించి నిరసన తెలపడంతో వాహన రాకపోకలు నిలిచాయి. దానిని గమనించిన ఎంపీ పోచా బ్రహ్మానందరెడ్డి వాహనం నుంచి దిగి రైతులతో మాట్లాడారు. అధికార పార్టీ నాయకుల కోసం రోడ్డు అలైన్​మెంట్​ మార్చారని ఎంపీకి రైతులు వివరించారు. స్పందించిన
ఎంపీ అక్కడి నుంచే అధికారులతో ఫోన్లో మాట్లాడి రోడ్డు సర్వే తాత్కాలికంగా నిలుపుదల చేయాలని సూచించారు. రైతుల అభిప్రాయం తీసుకున్నాకే సర్వే మొదలు పెట్టాలని అధికారులకు వివరించారు. దీంతో రైతులు ధర్నా విరమించారు.