BJP Leader Bhanuprakash on TTD Funds: తిరుపతి నగరాభివృద్ధి బాధ్యత ప్రభుత్వానిదే.. శ్రీవారి నిధుల ఖర్చు సరికాదు: భానుప్రకాశ్​

BJP Spokesperson Bhanuprakash on TTD Funds: టీటీడీ నిధులను తిరుపతి కార్పోరేషన్​కు మళ్లించాలనే ప్రభుత్వ ప్రయత్నంపై.. బీజేపీ రాష్ట్ర అధికార ప్రతినిధి భానుప్రకాశ్​ స్పందించారు. తిరుపతిలో నిర్వహించిన మీడియా సమావేశంలో ఆయన పాల్గొన్నారు. టీటీడీ నిధులను తిరుపతి కార్పొరేషన్​కు మళ్లించే ప్రయత్నాన్ని ఆయన తప్పు పట్టారు. వక్ఫ్​ బోర్డు, క్రిస్టియన్​ మిషనరీల నుంచి నిధులను​ తీసుకువచ్చి నగరాభివృద్ధికి ఖర్చు చేసే ధైర్యం ప్రభుత్వానికి ఉందా అని ప్రశ్నించారు. ధార్మిక చట్టానికి విరుద్ధంగా ధర్మకర్తల మండలి నిర్ణయం తీసుకోవడం సరైంది కాదన్నారు. ఎమ్మెల్యే, టీటీడీ ఛైర్మన్​ రాష్ట్ర ప్రభుత్వం నుంచి నిధులను తీసుకువచ్చి తిరుపతి అభివృద్ధికి ఖర్చు చేయాలని సవాల్​ విసిరారు. 

అభివృద్ధికి బీజేపీ వ్యతిరేకం కాదని.. తిరుపతి నగరాభివృద్ధి బాధ్యత ప్రభుత్వానిదని గుర్తు చేశారు. వైసీపీ నాయకుల లబ్ది కోసం శ్రీవారి నిధులను ఖర్చు చేయటం సబబు కాదని అన్నారు. ముఖ్యమంత్రి జగన్​మోహన్​ రెడ్డి.. బీజేపీ రాష్ట్ర అధ్యక్షురాలు పురందేశ్వరిపై చేసిన వ్యాఖ్యలపై భానుప్రకాశ్​ స్పందించారు. జగన్​ చేసిన వ్యాఖ్యలను ఆయన ఖండించారు. జగన్​ చేసిన వ్యాఖ్యలు సరికావని.. ఆయన చేసిన దిగజారుడు మాటలను వెనక్కి తీసుకోవాలని అన్నారు.