ఉరవకొండ పోలీసు స్టేషన్​ బాధితులు ధర్నా - న్యాయం చేయాలని డిమాండ్​

Agitation in Front of The Police Station : అనంతపురం జిల్లా ఉరవకొండ పోలీస్​ స్టేషన్​ వద్ద మంగళవారం సాయంత్రం ఓ కుటుంబం ఆందోళనకు దిగింది. శ్రీనివాసులు అనే వ్యక్తి తరచూ వేధిస్తున్నాడని పోలీసులకు ఫిర్యాదు చేసిన పట్టించుకోవడం లేదని ఆవేదనా వ్యక్తం చేశారు. గతేడాది నవంబరులో శ్రీనివాసులు కత్తితో పొడిచారని దీనిపై పోలీసులు నాన్-​బెయిలబుల్​ కేసు నమోదు చేసినా అరెస్ట్​ చేయకుండా నిర్లక్ష్యం చేస్తున్నారని మండిపడ్డారు. రెండు వారాల క్రితం కులం పేరిట దూషిస్తూ వేధించారని ఆవేదన వ్యక్తం చేశారు. మరోసారి పోలీసులను ఆశ్రయించినా ఎలాంటి ఫలితం లేదన్నారు.

న్యాయం చేయాలంటూ శ్రీకాంత్​, అతని భార్య చంద్రకళ బంధువులతో కలిసి మంగళవారం పోలీసు స్టేషన్​ ఎదుట ధర్నా చేపట్టారు. కత్తితో పొడిచి, కులం పేరుతో దూషించునందుకు శ్రీనివాసులపై ఎస్సీ, ఎస్టీ అట్రాసిటీ కేసును నమోదు చేయాలని బాధితులు పోలీసులను కోరుకున్నారు. పోలీసులు సర్ది చెప్పినా వినకుండా స్టేషన్​ ఎదుట రహదారిపై బైఠాయించడం వల్ల కాసేపు ఉద్రిక్తత నెలకొంది. ఆందోళనకారులు అక్కడి నుంచి శ్రీనివాసులు ఇంటికి వెళ్లి నిరసన తెలిపారు. పోలీసులు జోక్యంతో పరిస్థితి సద్దుమణిగింది.