T20 WorldCup England Won: టీ20 ప్రపంచకప్‌ 2022 విజేతగా ఇంగ్లాండ్ నిలిచింది. పాకిస్థాన్‌తో జరిగిన ఫైనల్‌లో ఆల్‌రౌండ్‌ ప్రదర్శనతో అదరగొట్టి ఐదు వికెట్ల తేడాతో విజయం సాధించి టైటిల్‌ని ఎగరేసుకుపోయింది. అదృష్టంతో ఫైనల్కు చేరుకున్న పాకిస్థాన్కు బట్లర్ సేన గట్టి షాక్ ఇచ్చింది.
లక్ష్య చేధనలో భాగంగా బ్యాటింగ్‌కు దిగిన ఇంగ్లాండ్ ఐదు వికెట్లు కోల్పోయి, మరో ఓవర్‌ మిగిలి ఉండగానే టైటిల్‌ను సొంతం చేసుకుంది. బెన్‌స్టోక్స్‌ 52(49)* అర్ధశతకంతో అజేయంగా నిలిచి మ్యాచ్ గెలవడంలో కీలక పాత్ర పోషించాడు. అతడికి ఓపెనర్‌ జోస్‌ బట్లర్ 26(17)తో పాటు హ్యారీ బ్రూక్‌ 20(23), మొయిన్‌ అలీ 19(13) సహకారం అందించారు. ఇంగ్లాండ్కు ఇది రెండో టీ20 టైటిల్‌. 2010లో ఇంగ్లిష్‌ జట్టు తొలిసారి టీ20 కప్ను సొంతం చేసుకుంది.
తొలుత బ్యాటింగ్ చేసిన పాకిస్థాన్.. టైట్ బౌలింగ్ మధ్య ప్రత్యర్థి ఇంగ్లాండ్కు 138 పరుగుల లక్ష్యాన్ని నిర్దేశించింది. కెప్టెన్ బాబర్ అజామ్(32), షాన్ మసూద్(38) ఫర్వాలేదనిపించారు. మిగతా బ్యాటర్లు రిజ్వాన్(15), హారిస్(8), ఇఫ్తికార్ అహ్మద్(0), షాదబ్ ఖాన్(20), మహ్మద్ నవాజ్(5), వాసిమ్ జూనియర్(4), షహీన్ అఫ్రిది(5), హారిస్ రవూఫ్(1) నిరాశపరిచారు. నిర్ణీత ఓవర్లలో ఎనిమిది వికెట్ల నష్టానికి 137 పరగులు చేయగలిగారు. ఇంగ్లాండ్ బౌలర్లు.. సామ్ కరన్ మూడు వికెట్లు తీయగా.. ఆదిల్ రషీద్, క్రిస్ జోర్డాన్ చెరో రెండు వికెట్లు తీశారు. బెన్ స్ట్రోక్స్ ఒక వికెట్ పడగొట్టాడు.
