ఆర్థిక కష్టం దంపతుల ఉసురు తీసింది.. చిన్నారిని అనాథను చేసింది!

పండుగ పూట సంతోషంగా ఉండాల్సిన ఆ దంపతులు.. బలవంతంగా ప్రాణం తీసుకున్నారు. నెల వయసున్న పసిగుడ్డును నిర్దాక్షిణ్యంగా వదిలేసి.. ఆత్మహత్య చేసుకున్నారు. కడపకు చెందిన ఈ భార్యాభర్తలు.. ఆర్థిక కష్టాలతోనే.. హైదరాబాద్ లో బలవన్మరణానికి పాల్పడ్డారు.

హైదరాబాద్​ మేడిపల్లి పోలీస్​ స్టేషన్​ పరిధిలో పండుగ పూట దారుణం జరిగింది. బోడుప్పల్​లోని సాయిరాం కాలనీలో ఉంటున్న యువ దంపతులు అక్షత్ ​(26), చైతన్య (24) ఉరి వేసుకుని ఆత్మహత్యకు పాల్పడ్డారు. ఏపీలోని కడప జిల్లా చంపాడు గ్రామానికి చెందిన ఈ దంపతులు జీవనోపాధి కోసం హైదరాబాద్ లోని బోడుప్పల్​ కు వలస వచ్చారు. అందరూ సంక్రాంతి సంబరాల్లో ఉన్న వేళ.. వారు తనువు చాలించారు. వీరికి నెల వయస్సు గల కుమార్తె ఉంది. పోలీసులు అక్కడికి చేరుకున్నారు. కేసు దర్యాప్తు చేస్తున్నారు. ఆర్థిక సమస్యలే ఈ దారుణానికి కారణమని పోలీసులు ప్రాథమికంగా గుర్తించారు.