పెళ్లి దుస్తులకు వెళ్లి...అనంతలోకాలకు

కడప జిల్లా పులివెందుల ఆర్టీసీ బస్టాండ్ సమీపంలో ఇండేన్ గ్యాస్ సిలిండర్ల లారీ ద్విచక్ర వాహనాన్ని ఢీ కొట్టిన ఘటనలో ఓ యువకుడు మృతి చెందాడు.

పెళ్లి బట్టలు కొనుగోలు చేసుకొని వస్తున్న ఆ పెళ్లికొడుకుకి లారీ రూపంలో మృత్యువు ఎదురైంది. ఈ విషాదకర సంఘటన కడప జిల్లా పులివెందుల ఆర్టీసీ బస్టాండ్ సమీపంలో చోటుచేసుకుంది. మృతుడు వేముల మండలం భూమయ్యగారిపల్లె గ్రామానికి చెందిన మహేశ్వర్​రెడ్డిగా గుర్తించారు. యురేనియం కర్మాగారంలో పనిచేస్తున్న మహేశ్వర్​రెడ్డికి అక్టోబర్ 2న పెళ్లి నిశ్చయం కావటంతో పెళ్లి దుస్తులు కొనుగోలు చేయటానికి పులివెందుల వచ్చాడు. తిరిగి స్వగ్రామానికి వెళ్తున్న మహేశ్వర్​రెడ్డిని పులివెందుల ఆర్టీసీ బస్టాండ్ సమీపంలో ఇండేన్ గ్యాస్​ సిలిండర్లను తరలిస్తున్న లారీ ఢీకొట్టడంతో అక్కడికక్కడే మృతిచెందాడు. సమాచారం అందుకున్న పోలీసులు సంఘటనా స్థలానికి చేరుకొని కేసు నమోదు చేసి దర్యాప్తు చేస్తున్నారు.

ఇదీ చదవండి : కుందూ నదిలో దూకిన కుటుంబం... ఒకరి మృతదేహం లభ్యం