కడప జిల్లాలోని పురపాలక, నగరపాలక సంస్థ శివారులోని గ్రామ పంచాయతీల్లో అక్రమంగా, అనుమతి లేని లే-అవుట్లు జోరుగా విస్తరిస్తున్నాయి. నిబంధనలను తుంగలో తొక్కి ఎంచక్కా స్థిరాస్తి వ్యాపారులు పెద్ద ఎత్తున అనుచిత లబ్ధి పొందుతున్నారు. వ్యయసాయేత భూములుగా మార్పిడి, సామాజిక ప్రయోజనాలకు పది శాతం స్థలాలు, అంతర్గత రహదారులను పట్టించుకోవడం లేదు. అన్ని విధాలుగా గ్రామ పంచాయతీలకు వచ్చే ఆదాయానికి, ప్రయోజనాలకు రియల్టర్లు ఎసరుపెడుతున్నారు. చట్టంలోని లోసుగులను అనుకూలంగా మలుచుకుంటున్నారు.
చట్టం ఏం చెబుతోంది...
● 2002 మార్చిలో ప్రభుత్వం జారీ చేసిన 67వ జీవో ప్రకారం అనుమతి లేని లే- అవుట్‌లో కట్టడాలకు నిర్మాణ ఆకృతి నిలిపేత, అభివృద్ధి పనులు చేపట్టవద్దని స్పష్టంగా పేర్కొన్నారు.
తక్కువ శాతం రుసుం...
●పురపాలిక, పంచాయతీలోని శివారు ప్రాంతాల్లో రహదారుల పక్కన వ్యయసాయ భూముల్లో పెద్ద ఎత్తున నివేశన ప్లాట్ల విభజన, అమ్మకాలను స్థిరాస్తి వ్యాపారులు చేపడతున్నారు. సెంటు రూ.2 లక్షల నుంచి ఆపై డిమాండు ఉంటే స్థలానికి ధర అమాంతంగా పెంచేసి సొమ్ము చేసుకుంటున్నారు. అనుమతి లేని అవుట్‌ కాలనీల్లో కొనుగోలు చేసిన స్థలాల్లో కట్టడాలకు నిర్మాణ ఆకృతికి ఆమోదం ఇవ్వకుండా నిలిపేస్తే ప్రభుత్వానికి ఆదాయ వనరులు పెరుగుతాయి. దీనిని నియంత్రించడంలో వైఫల్యం కప్పిపుచ్చుకోనేందుకు 2016లో 12వ జీవోను ప్రభుత్వం జారీ చేసింది. అనుమతి లేని అవుట్‌లో కొనుగోలు చేసిన స్థలంలో గృహ, భవనాలు, వ్యాపార సముదాయాలకు సబ్‌ రిజిస్ట్రార్‌ ఆధారంగా మార్కెట్‌ విలువలో 14 శాతం రుసుం జమ చేయగానే నిర్మాణ ఆకృతి పత్రాలను పంచాయతీ కార్యదర్శులు జారీ చేస్తున్నారు.
ఎడతెగని పంచాయితీ...
● జిల్లాలోని 791 పంచాయతీల్లో 14 శాతం కన్నా తక్కువ రుసుం కట్టించుకుంటున్నట్లు విమర్శలు ఉన్నాయి. ఈ వ్యవహరంపై ఉన్నతాధికారులకు ఫిర్యాదులు చేస్తున్న బాధ్యులపై విచారణ, చర్యలు గడపదాటకపోవడం గమనార్హం.
సామాజిక కట్టడాలకు స్థలాల కొరత...
● జిల్లాలోని 791 గ్రామ పంచాయతీల్లో రెవెన్యూ స్థలాలకు కొరత తీవ్రంగా ఉంది. 50 మండలాల పరిధిలోని 631 సచివాలయాలు, 597 రైతు భరోసా కేంద్రాలు, 500 విలేజ్‌ హెల్త్‌ క్లీనిక్‌ నిర్మాణాల కోసం స్థలాలకు కొరత తీవ్రంగా ఉంది. ఈ సమస్య వల్ల పలు చోట్ల కట్టడాలను చేపట్టని పరిస్థితులు ఉన్నాయి. 1,570 అంగన్వాడీ కేంద్రాలకు సరిపడే స్థలాలు దొరకలేదు. లే-అవుట్‌ ప్రకారం 10 శాతం సామాజిక స్థలాలు అందుబాటులో ఉంటే ఈ తరహా సమస్యలు ఉండవని పీఆర్‌ ఇంజినీరింగ్‌ సిబ్బంది చెబుతున్నారు. నిబంధనలను తోసిరాజని నిర్మించిన బహుళ అంతస్థుల నివేశన సముదాయాలను మార్జిగేజ్‌ పద్ధతిలో పంచాయతీ పేరు మీదుగా గదులను రిజిస్ట్రేషన్‌ విధానం తుస్సుమన్పిస్తున్నారు.
లే అవుట్‌ అంటే ఇదీ...
●లే-అవుట్‌ ప్రకారం మొత్తం స్థలంలో 30 అడుగులు, 20 అడుగుల వెడల్పు కలిగిన రహదారుల ఏర్పాటు కోసం, 10 శాతం సామాజిక స్థలాన్ని గ్రామ పంచాయతీ పేరుమీదుగా బదలాయింపు చేయాలి. అలా కాకుండా కార్యదర్శులు మమ అన్పిస్తున్నారు. దీంతో గ్రంథాలయం, పాఠశాల, ఉద్యానాలు, అంగన్వాడీ, శ్మశానాలకు స్థలాలు కన్పించకుండా ఉన్నాయి. డీపీవో కార్యాలయానికి నిర్మాణ ఆకృతి వివరాలను పంచాయతీ కార్యదర్శులు పంపుతున్న దాఖలాలు లేవు.
జిల్లాలో పరిస్థితి ఇదీ...
●జిల్లాలో మొత్తం 919.05 ఎకరాల విస్తీర్ణంలో అనధికారిక/ అక్రమంగా 116 లే-అవుట్లు ఉన్నాయని ఉన్నతాధికారులు గుర్తించారు. పట్టణాభివృద్ధి సంస్థల పరిధిలోని గ్రామ పంచాయతీల్లో వాటి వివరాలను ప్రదర్శించారు. రిజిస్ట్రేషన్‌ కొన్ని రోజులు పాటు నిలిపేయడంతో భారీగా ఆదాయాన్ని కోల్పోవడం దృష్ట్యా మళ్లీ యధావిధిగా అనుమతులను పునరుద్ధరించారని పలువురు పంచాయతీ కార్యదర్శులు చెబుతున్నారు.
ఏం జరుగుతోంది?
చట్టానికి భిన్నంగా మార్కెట్‌ విలువలో 14 శాతం రుసుం కట్టించుకొని నిర్మాణ ఆకృతి మంజూరు చేసేందుకు వీలుగా 2016లో 12వ జీవో జారీ అయింది. దీనిని అడ్డుగా పెట్టుకొని అనుమతి లేని లే-అవుట్లు సంబంధించి కట్టడాలను రాజమార్గాన్ని కల్పిస్తున్నారు. ఈ నేపథ్యంలో నాలా పన్ను, 10 శాతం సామాజిక స్థలాల కోల్పోవడంతో ప్రభుత్వ ఆదాయానికి గండిపడుతోంది. దీనిపై తహసీల్దారు, పంచాయతీ కార్యదర్శులు సంబంధం లేని విధంగా వ్యహరిస్తున్నారు. ఫలితంగా అక్రమ లే-అవుట్ల ద్వారా వెంచర్లు పుట్టగొడుగుల్లాగా రియల్టర్లు ఏర్పాటు చేసుకోని పబ్బం గడుపుకొంటున్నారు.
బాధ్యులను గుర్తిస్తున్నాం
అనుమతి లేని లే-అవుట్లు ద్వారా వెంచర్లు ఏర్పాటు చేసిన వారిపై వస్తున్న ఫిర్యాదుల ఆధారంగా బాధ్యులను గుర్తిస్తున్నాం. వీరికి తాఖీదులు జారీ చేయాలని పంచాయతీ కార్యదర్శులకు ఆదేశాలు జారీ చేశాం. 10 శాతం సామాజిక స్థలాలను కోల్పోవడం వల్ల సచివాలయాలు, ఆర్‌బీకే, హెల్త్‌ వెల్‌నెస్‌ కట్టడాలకు ఇబ్బందులు ఉన్నాయి. 14 శాతం కన్నా తక్కువ రుసుం వసూలు చేస్తే ఆడిట్‌ పరిశీలనలో గుర్తిస్తాం. లే-అవుట్‌ కోసం ఆమోదం ఉండేలా పర్యవేక్షించాల్సిన బాధ్యత కార్యదర్శులపై ఉంది. దీనిపై వస్తున్న ఫిర్యాదులను పరిశీలించి శాఖపరంగా చర్యలు చేపడుతాం. - ప్రభాకర్‌రెడ్డి, జిల్లా పంచాయతీ అధికారి
ఇదీ చదవండి:
