కడప జిల్లా పర్యటనలో భాగంగా తెదేపా అధినేత చంద్రబాబు రెండో రోజు వైకాపా బాధితుల కష్టాలు విని చలించిపోయారు. పార్టీ మారకుంటే కేసులు పెడతామనే బెదిరింపులు సహా దాడులకు పాల్పడుతున్నారని పలువురు చంద్రబాబు వద్ద ఆవేదన వ్యక్తం చేశారు. పులివెందులకు చెందిన ఓ బాధితుడు ఇంటికి అడ్డంగా గోడ కట్టారని వాపోయాడు. పోలీసులు సైతం వారికే సహకరించారని తెలిపాడు. పార్టీ మారలేదని దాడి చేశారని ఓ వృద్ధుడు కంటతడి పెట్టగా ఓదార్చిన చంద్రబాబు... 50 వేల రూపాయలు ఆర్థిక సాయం చేశారు. వైకాపాకు ఓటేయలేదని పత్తిపంట ధ్వంసం చేశారని, అట్రాసిటీ కేసు పెట్టారని ఇలా పలువురు పార్టీ అధినేత వద్ద గోడు వెళ్లబోసుకున్నారు.
సీఎం ఏం చేస్తున్నారు ?
తన సొంత నియోజకవర్గంలోనే దౌర్జన్యాలు జరుగుతుంటే ముఖ్యమంత్రి జగన్ ఏం చేస్తున్నారని చంద్రబాబు నిలదీశారు. వైకాపా బాధితుల కష్టాలను తమ ఎన్నికల మ్యానిఫెస్టోలో పెడతామని హామీ ఇచ్చారు.
నియోజకవర్గాల సమీక్ష
వైకాపా బాధితులతో సమావేశం ముగిసిన తర్వాత మధ్యాహ్నం నుంచి రాత్రి వరకు జిల్లాలోని కమలాపురం, ప్రొద్దుటూరు, జమ్మలమడుగు, పులివెందుల, మైదుకూరు, కడప నియోజకవర్గాల కార్యకర్తలతో చంద్రబాబు సమీక్షించారు. ఎన్నికల్లో పార్టీ వైఫల్యంపై అభిప్రాయాలు తెలుసుకున్నారు. ఉదయం మీడియా సమావేశం తర్వాత చంద్రబాబు అమరావతి బయల్దేరి వెళ్లనున్నారు.
ఇదీ చదవండి :
