విజయనగరం జిల్లా పూసపాటిరేగ మండలం చౌడివాడ గ్రామంలో మహిళ పై పెట్రోల్ పోసి నిప్పంటించిన ఘటనలో నిందితుడు రాంబాబును అరెస్ట్ చేసినట్లు జిల్లా ఎస్పీ దీపికా పాటిల్ వెల్లడించారు. దిశా యాప్ సాయంతో నిందితుడిని కృష్ణాపురం గ్రామంలో అరెస్ట్ చేశామని తెలిపారు. ఈ ఘటనలో ప్రధాన నిందితునికి సహకరించినవారెవరున్నారు అన్న దానిపై దర్యాప్తు కొనసాగిస్తున్నామని వెల్లడించారు.
ఒక బైక్ నుంచి నిందితుడు ముందస్తు ప్రణాళిక ప్రకారం పెట్రోల్ తీసి, బాధితురాలిపై పోసినట్లు విచారణలో నిర్థారణ అయినట్లు ఎస్పీ తెలిపారు.
బాధితురాలి మీద అనుమానంతో..
ఎనిమిది నెలల క్రితం బాధితురాలితో నిందితుడికి ఎంగేజ్ మెంట్ అయింది. పెద్దలు ఇద్దరికీ పెళ్లి చేసేందుకు నిర్ణయించారు. ఆ తరువాత నిందితుడికి.. బాధితురాలి మీద అనుమానం వచ్చింది. తరచు ఆమె వేరే వ్యక్తితో మాట్లాడుతోందని నిందితుడు కక్ష పెంచుకున్నాడు. రెండు కుటుంబాల మధ్య స్పర్థలు వచ్చాయి. అన్నింటినీ పక్కన పెట్టి రెండు నెలల క్రితం పూసపాటిరేగ పోలీస్ స్టేషన్ లో రాజీ కుదుర్చుకున్నారు. ఈ రాజీ ప్రకారం ఎలాంటి గొడవలు లేకుండా పెళ్లి చేసుకోవడానికి నిందితుడు కూడా అంగీకరించాడు. అయినప్పటికీ మనసులో సందేహాం పెట్టుకున్న నిందితుడు..బాధితురాలిపై పెట్రోల్ పోసి హత్య చేసేందుకు యత్నించాడు.
విజయనగరం జిల్లాలో సంచలనం రేకెత్తించిన సంఘటనపై ఫిర్యాదు అందిన వెంటనే పోలీసులు రంగంలోకి దిగారు. దిశా యాప్ ను ఉపయోగించి నిందితుడ్ని పట్టుకున్నారు.
అత్యవసర పరిస్థితుల్లో మహిళలు దిశా యాప్ ను ఉపయోగించాల్సిందిగా ఎస్పీ కోరారు.
ఏం జరిగిందంటే..?
విజయనగరం జిల్లా పూసపాటిరేగ మండలం చౌడువాడలో యువతిపై ఓ యువకుడు పెట్రోల్ పోసి నిప్పంటించిన ఘటన సంచలం రేపింది. అడ్డుకోబోయిన యువతి అక్క, ఆమె కుమారుడికి.. గాయాలయ్యాయి. ముగ్గురినీ విజయనగరం జిల్లా ఆస్పత్రికి బాధితుల్ని హుటా హుటిన తరలించారు. ఈ ఘాతుకానికి పాల్పడిన వ్యక్తి నరవకు చెందిన రాంబాబుగా పోలీసులు గుర్తించారు.
రాంబాబు, బాధిత యువతి కొన్ని రోజులుగా ప్రేమించుకుంటున్నారు. ఇరు కుటుంబాలు కూడా వీరి పెళ్లికి అంగీకరించాయి. అయితే ఇటీవల ఆ యువతి వేరే యువకుడితో మాట్లాడుతోందంటూ రాంబాబు.. పెళ్లి రద్దు చేసుకున్నాడు. ఈ నేపథ్యంలోనే ఇరు కుటుంబాల మధ్య గొడవలు జరుగుతున్నాయి. గురువారం రాత్రి రెండు కుటుంబాలకు పోలీసుల సమక్షంలో రాజీ కుదిరింది. పోలీసుల సూచనతో వివాహం చేసుకునేందుకు యువకుడు అంగీకరించాడు. ఆ తర్వాత అర్ధరాత్రి సమయంలో ఈ అఘాయిత్యానికి పరారయ్యాడు.
ఇవీ చదవండి: PETROL ATTACK: యువతిపై పెట్రోల్ పోసి నిప్పంటించిన యువకుడు..పోలీసుల అదుపులో దుండగుడు
CM Jagan: పెట్రోల్ దాడి ఘటనపై సీఎం జగన్ ఆరా.. మెరుగైన వైద్యానికి ఆదేశాలు
