ఉల్లి కోసం గంటల తరబడి నిరీక్షణ... అయినా దక్కని వైనం

ఉల్లి కోసం మహిళలు గంటల తరబడి క్యూలైన్​లో వేచియున్నారు. ఈలోగానే నిల్వలు అయిపోయాయి. అంతే వారిలో ఆగ్రహం ఒక్కసారిగా కట్టలు తెంచుకుంది. అధికారులపై విరుచుకుపడ్డారు. ఈ ఘటన విజయనగరం జిల్లా పార్వతీపురం రైతుబజారులో జరిగింది.

విజయనగరం జిల్లా పార్వతీపురం రైతు బజార్ వద్ద మహిళలు ఆందోళనకు దిగారు. ఉదయం నుంచి ఉల్లిపాయల కోసం క్యూలైన్​లో నిలబడినా తమ వంతు వచ్చేసరికి అయిపోవటంతో ఆందోళనకు దిగారు.

రైతు బజార్​లో ప్రభుత్వం రాయితీ మీద ఉల్లిపాయలు ఉదయం 11 గంటలకే అయిపోయాయి. దీనితో మహిళలు తీవ్ర ఆగ్రహానికి గురయ్యారు. దూరప్రాంతాల నుంచి వచ్చామని... పలుమార్లు తిరిగినా ఉల్లి దొరకటం లేదని వాపోయారు. శుక్రవారం రాత్రి రెండు టన్నుల ఉల్లి రైతు బజార్​కు చేరింది. ఉదయం 6 గంటలకు పంపిణీ ప్రారంభించారు. 5గంటల్లోనే స్టాక్ అయిపోవడంతో వందలాది మంది నిరాశతో వెనుదిరగాల్సి వచ్చింది. అధికారులను నిలదీస్తూ.. గ్రామ వాలంటీర్లతో ఉల్లిపాయలు పంపిణీ చేయాలని మహిళలు డిమాండ్ చేశారు. పోలీసులు రైతుబజార్​కు చేరుకుని పరిస్థితిని చక్కదిద్దారు.

ఇదీ చూడండి