Ganja sales in state: వ్యసనాలకు బానిసలుగా మారి డబ్బు కోసం గంజాయి అమ్ముతున్న ఇద్దరు వ్యక్తులను అదుపులోకి తీసుకొని విచారిస్తున్నామని విజయవాడ అసిస్టెంట్ కమిషనర్ ఆఫ్ పోలీస్ డాక్టర్ బి. రవికిరణ్ తెలిపారు. విజయవాడ గవర్నర్ పేట పోలీసులకు వచ్చిన సమాచారం మేరకు గోరా పార్క్ వద్ద గంజాయి కలిగి ఉన్న ఇద్దరు వ్యక్తులను అదుపులోకి తీసుకొని.. వారి వద్ద ఉన్న 700 గ్రాముల గంజాయిని సీజ్ చేశామన్నారు. డీజీపీ రాజేంద్రనాథ్ రెడ్డి ఆదేశాల మేరకు నగరంలో గంజాయి అమ్మకందారులపై ఉక్కు పాదం మోపామన్నారు.
గంజాయి తాగే అలవాటు ఉన్నవారు గంజాయి అమ్మకందారులుగా మారుతున్నట్లు గమనించామని.. వారు విజయవాడ పరిసర ప్రాంతాల్లో గంజాయి సేవిస్తూ.. ఇతరులకు చిన్నచిన్న ప్యాకెట్లుగా తయారుచేసి అమ్ముతున్నారని ఏసీపీ రవికిరణ్ తెలిపారు. తల్లిదండ్రులు కూడా తమ పిల్లలను గమనిస్తూ ఉండాలని.. చెడు వ్యసనాలకు బానిసలుగా మారకుండా చూడాలన్నారు. నగరంలో గంజాయి సేవిస్తున్న వారికి కౌన్సిలింగ్ ఇస్తున్నామని ఎవరైనా గంజాయి అమ్ముతున్నట్లు తెలిస్తే వారిపై కఠిన చర్యలు తీసుకుంటామని హెచ్చరించారు.
గంజాయి అమ్మకాలపై నిఘా: ఈ మధ్య కాలంలో రాష్ట్రంలో గంజాయి ఎక్కడబడితే అక్కడ పట్టుబడుతూనే ఉంది. గతంలో ప్రధాన నగరాల్లో మాత్రమే లభించే గంజాయి.. ఇప్పుడు మారుమూల గ్రామాలకూ పాకింది. గంజాయి అక్రమ రవాణా, అమ్మకాలు యథేచ్ఛగా జరుగుతుంది. పోలీసులకు వందల కిలోల గంజాయి పట్టుబడుతుంటే వారి కళ్లుగప్పి వేలాది కిలోల అమ్మకాలు జరుగుతున్నాయి. మహిళలలు కూడా గంజాయి అమ్మకాల్లో పాల్గొంటున్న విషయం ఆందోళన కలిగిస్తోంది. ఇకపోతే డీజీపీ రాజేంద్రనాథ్ రెడ్డి ఆదేశాల మేరకు నగరంలో పోలీసు యంత్రాంగం గంజాయి అమ్మకందారులపై ఉక్కుపాదం మోపింది.
200 కిలోల గంజాయి స్వాధీనం.. విజయనగరం జిల్లా శృంగవరపుకోట పోలీసులు రెండు వేర్వేరు కేసుల్లో రెండు కార్లతో పాటు సుమారు 200 కిలోల గంజాయిని స్వాధీనం చేసుకున్నారు. దీనికి సంబంధించి.. విశ్వసనీయ సమాచారం మేరకు.. ఎస్ కోట పోలీసు స్టేషన్ పరిధిలోని బొడ్డవర కూడలిలో మరమ్మతు కారణంగా.. నిలిచిపోయిన గుజరాత్ రిజిస్ట్రేషన్ ఉన్న కారులో స్థానికులు గంజాయిని గుర్తించి పోలీసులకు సమాచారం అందించారు. స్థానికుల సమాచారం మేరకు పోలీసులు తనిఖీలు నిర్వహించి.. కారుతో పాటు 120 కిలోల గంజాయిని స్వాధీనం చేసుకుని.. ఇద్దరు వ్యక్తులను అదుపులోకి తీసుకున్నారు.
మరో సంఘటనలో బొడ్డవర చెక్ పోస్ట్ వద్ద ఆపకుండా వెళ్లిపోయిన మహారాష్ట్ర రిజిస్ట్రేషన్ ఉన్న కారును ఎస్ కోట పోలీసులు వెంబడించారు. కారుని అదుపులోకి తీసుకుని సుమారు 80 కిలోల గంజాయిని పట్టుకున్నారు. గంజాయితో పాటు.. కారులో ఉన్న వ్యక్తులను అదపులోకి తీసుకుని పోలీసులు విచారిస్తున్నారు. ఈ రెండు కేసులపై పూర్తి స్థాయి సమాచారం కోసం విచారణ నిర్వహిస్తున్నట్లు ఎస్ కోట పోలీసులు తెలిపారు.
ఇవీ చదవండి:
