పరిషత్ ఎన్నికలకు పలువురు సర్పంచ్లు పోటీలో ఉన్నారు. వారు గతేడాది ఎంపీటీసీ స్థానాలకు నామినేషన్ వేసి ఎన్నికలకు సిద్దమవ్వగా.. కరోనా కారణంగా ఎన్నికల మధ్యలోనే నిలిచిపోయాయి. ఈ ఏడాది ఫిబ్రవరిలో నిర్వహించిన సర్పంచ్ ఎన్నికలు రావడంతో ఎంపీటీసీ స్థానాలకు పోటీ చేసినవారు.. కొందరు సర్పంచ్లుగా పోటీచేసి గెలిచారు. గతేడాది మధ్యలో ఆగిన ఎంపీటీసీ ఎన్నికలు కొనసాగించడంతో ప్రస్తుతం పలువురు సర్పంచ్లు.. పరిషత్ పోరులో తలపడుతున్నారు.
విశాఖ జిల్లా చీడికాడ మండలం ఖండివరం గ్రామానికి చెందిన సర్పంచి శీరంరెడ్డి లక్ష్మీ ఎంపీటీసీగా తెలుగుదేశం పార్టీ తరుపున పోటీ చేస్తున్నారు. బుచ్చయ్యపేట మండలం సీతయ్యపేట సర్పంచి వజ్రపు ఇందిర తెదేపా తరుపున ఎంపీటీసీ అభ్యర్థిగా పోటీలో ఉన్నారు. చోడవరం మండలం భోగాపురం సర్పంచి పొలిమేర బాల గంగాధర్ శ్రీనివాసరావు గోవాడ ఎంపీటీసీ స్థానానికి తెదేపా తరుపున పోటీ చేస్తున్నారు. ఈయన ఎంపీటీసీ అభ్యర్థికి డమ్మీగా వేశారు. బరిలో నిలవాల్సిన అసలు వ్యక్తి నామినేషన్ పరిశీలనలో పోవడంతో.. బాల గంగాధర్ శ్రీనివాసరావు పోటీలో ఉన్నారు.
