విశాఖ మన్యంలో తరచూ డోలీమోతలు వెలుగుచూస్తూనే ఉన్నాయి. సరైన రహదారి, రవాణా సదుపాయాలు లేకపోవడంతో ప్రసూతి సమయం వరకూ ఇళ్ల వద్దే ఉండిపోతున్నారు. ఈ పరిస్థితి ఒక్కోసారి వారి ప్రాణాలమీదకూ తీసుకొస్తోంది. ఈ నేపథ్యంలో మన్యంలో డోలీమోతలు తప్పేలా ఐటీడీఏ చర్యలు చేప‌ట్టింది. చింతపల్లి కేంద్రంగా గర్భిణుల కోసం గతంలో నిర్మించిన సామాజిక భ‌వ‌నాన్ని గ‌ర్బిణుల వ‌స‌తిగృహంగా మార్పులు చేసింది. ఈ వసతి గృహాన్ని పాడేరు ఐటీడీఏ ప్రాజెక్ట్ అధికారి గోపాల‌కృష్ణ, ఎమ్మెల్యే భాగ్య‌ల‌క్ష్మి ప్రారంభించారు.
ఈ భవనంలో 10 బెడ్లు ఏర్పాటు చేశామని.. డెలివరీకి ప‌క్షం రోజులుముందునుంచే మారుమూల ప్రాంతాల‌కు చెందిన గ‌ర్బిణుల‌కు ఇక్కడ వైద్య‌సేవ‌లు అందించనున్నట్టు అద‌న‌పు డీఎంహెచ్‌వో తెలిపారు. గర్భిణులకు పౌష్టికాహార కోసం ఒక్కరికి రోజుకి రూ.240 ప్రభుత్వం కేటాయించిందని.. ఈ అవకాశం వినియోగించుకోవాలని ఎమ్మెల్యే భాగ్య‌ల‌క్ష్మి కోరారు.
ఈ వసతి గృహంలో చేరే మహిళలకు వైద్యుల పర్యవేక్షణలో కాన్పు చేయ‌డానికి అవ‌స‌ర‌మైన ఏర్పాట్లు చేశామని ఐటీడీఏ ప్రాజెక్ట్ అధికారి గోపాల‌కృష్ణ చెప్పారు. ఈ ప్రాజెక్టును ప్ర‌యోగాత్మ‌కంగా ఏర్పాటు చేశామని.. త్వరలో మరిన్ని కేంద్రాలు ఏర్పాటు చేస్తామన్నారు.
ఇదీ చదవండి..
Amaravati Farmers: 'న్యాయస్థానం నుంచి దేవస్థానం' మహా పాదయాత్ర.. తొలిరోజు సాగిందిలా..
