వాస్తుదోషం ఉందంటూ ప్రభుత్వ నిధులతో వేసిన సిమెంట్ రోడ్డును తొలగించారు. తమకు ఎదురేలేదు అనుకున్నారో ఏమో విశాఖ జిల్లా ఆనందపురం మండలం భీమందొరపాలెంలో చోటా నాయకుని కుటుంబీకులు.. రాత్రికి రాత్రే ప్రొక్లెయినర్తో సిమెంటు రోడ్డు పెకలించి, పెచ్చులను గ్రామ రహదారికి ఇరువైపులా పడేసారు. 2017 - 18 ఆర్ధిక సంవత్సరంలో జాతీయ ఉపాధి హామీ పథకంలో 152 మీటర్ల సీసీ రహదారిని ప్రభుత్వ 5 లక్షల వ్యయంతో వేయించింది. అయితే తమ ఇంటికి వాస్తు దోషం ఉందంటూ ఓ చోటా నాయకుడు కుటుంబీకులు రోడ్డును యంత్రాలతో పెకిలించి చదునుచేశారు.
రైతులు పొలాలకు వెళ్లడానికి, పశువులకు అనువుగా ఉండే రహదారిలో అకస్మాత్తుగా కొంత రహదారి మాయమవటంతో గ్రామస్థులు అవాక్కయ్యారు. పంచాయతీ కార్యాలయం తీసేయడంతో దూరంలో సచివాలయానికి సమాచారం అందించ లేకపోయామని స్థానికులు ఆవేదన వ్యక్తం చేశారు. ఆ కుటుంబానికి బయపడి ఫిర్యాదు చేయలేదని గ్రామస్థులు వాపోతున్నారు.
రామవరం సచివాలయ పరిధిలో ఉంది భీమందొరపాలెం. సచివాలయం పరిధిలో ప్రస్తుతం 11 నుంచి 15 మంది వరకు ఉద్యోగులతోపాటు ప్రతీ 50 కుటుంబాలకు ఓ వలంటీరు చొప్పున అనేక మందిని ప్రభుత్వం నియమించింది. వేతనాలు, గౌరవవేతనాలు పేరిట కోట్లాది రూపాయలు వెచ్చిస్తోంది. ప్రభుత్వ నిధులు వెచ్చించి నిర్మించిన సిమెంట్ రహదారిని పరిరక్షించకపోవడం పలువిమర్శలకు తావిస్తోంది.
