కేజీహెచ్​లో వైద్యుడిపై దాడి ఘటన..ఎనిమిది మంది అరెస్టు

విశాఖ కేజీహెచ్​లో వైద్యుడిపై దాడికి ఘటనలో ఎనిమిది మందిని అరెస్టు చేశారు. శ్యామ్ అనే యువకుడి మృతదేహానికి పోస్టుమార్టం చేసినందుకే నిందితులు ఈ దాడికి పాల్పడ్డారని హార్బర్ జోన్ ఏసీపీ శిరీష తెలిపారు.

విశాఖపట్నం కేజీహెచ్​లో వైద్యుడిపై దాడి చేసిన ఘటనలో ఎనిమిది మందిని అరెస్ట్ చేసినట్లు హార్బర్ జోన్ ఏసీపీ శిరీష తెలిపారు. నిందితులందరూ నేరప్రవృత్తి కలిగి ఉన్న వారేనని వెల్లడించారు. అనుమానాస్పద స్థితిలో మృతి చెందిన శ్యామ్ అనే యువకుడి మృతదేహానికి పోస్ట్​మార్టం చేసినందుకే వైద్యుడిపై దాడి చేసినట్లు ఏసీపీ వివరించారు.

నిందితులపై సెక్షన్‌ 307, 332, 353, 324, 323 r/34 ఏపీ మెడికేర్ సర్వీస్ పర్సన్, ఇన్​స్టిట్యూట్ యాక్ట్ సెక్షన్-4 కింద కేసు నమోదు చేసినట్లు పేర్కొన్నారు. కరోనా అత్యయిక పరిస్థితుల్లో సేవలందిస్తున్న వైద్యుడిపై దాడి చేయడం బాధాకరమని, ఎవరైనా ఇలాంటి చర్యలకు పాల్పడితే కఠిన చర్యలు తప్పవని ఏసీపీ శిరీష హెచ్చరించారు.

ఇదీచదవండి.