విశాఖ రుషికొండలో పర్యటక జల విహార నియంత్రణ కేంద్రాన్ని సీఎం జగన్మోహన్ రెడ్డి దృశ్య శ్రవణ మాధ్యమంలో సీఎం కార్యాలయం నుంచి ప్రారంభించారు. రాష్ట్రవ్యాప్తంగా సంస్కరణలో భాగంగా పర్యటక ప్రాంతాలలో పర్యటక రక్షణ, అవగాహన కోసం ఈ-చెక్ పోస్టులను ఏర్పాటు చేశారు. రాష్ట్రవ్యాప్తంగా 9 ప్రాంతాల్లో వీటిని ఏర్పాటు చేయగా.. రుషికొండ బీచ్లో కంట్రోల్ రూమ్ ఏర్పాటు చేశారు.
సీఎం కార్యాలయం నుంచి ముఖ్యమంత్రి జగన్ ఈ కంట్రోల్ రూమ్ను ప్రారంభించగా... రాష్ట్ర పర్యటక శాఖ మంత్రి ముత్తంశెట్టి శ్రీనివాసరావు కార్యక్రమంలో పాల్గొన్నారు. ఏటా రుషికొండలో ముప్ఫై వేల మందికి పైగా బోటింగ్ చేస్తారు. ఎలాంటి ప్రమాదాలు జరగకుండా ఈ కేంద్రాన్ని ఏర్పాటు చేసినట్లు అధికారులు తెలిపారు. రెవిన్యూ, పోలీస్, బోట్ ఆపరేటర్లు సమన్వయంతో ఈ కేంద్రం నిర్వహణలో పని చేస్తారు. కచ్చులూరు తరహా ఘటనలు పునరావృతం కాకుండా పటిష్ట చర్యలో భాగంగా పర్యాటక శాఖలో అనేక రక్షణ చర్యలు తీసుకుంటున్నట్లు కలెక్టర్ తెలిపారు.
