నేడు, రేపు సిక్కోలులో చంద్రబాబు పర్యటన

తెదేపా అధినేత చంద్రబాబు నేటి నుంచి రెండు రోజుల పాటు శ్రీకాకుళంలో పర్యటించనున్నారు. ఉదయం 10 గంటల నుంచి జిల్లా తెదేపా కార్యాలయంలో సర్వసభ్య సమావేశం ఉంటుందని తెదేపా నేత గణబాబు తెలిపారు.

తెదేపా అధినేత, జాతీయ అధ్యక్షుడు నారా చంద్రబాబు నాయుడు నేడు, రేపు శ్రీకాకుళంలో పర్యటించనున్నారు. జిల్లా పార్టీ కార్యాలయంలో నిర్వహిస్తున్న చంద్రబాబు పర్యటనకు సంబంధించిన ఏర్పాట్లులన్నీ పూర్తి చేశారు. తెదేపా రాష్ట్ర అధ్యక్షులు కిమిడి కళావెంకట్రావు, పార్టీ పరిశీలకులు గణబాబుతో పాటు తెదేపా నాయకులు సభా ప్రాంగణాన్ని పరిశీలించారు. జిల్లా తెదేపా కార్యాలయానికి ఉదయం 10 గంటల సమయంలో చంద్రబాబు చేరుకోనున్నారు. అనంతరం పార్టీ శ్రేణులతో పాటు కార్యకర్తలతో జరగనున్న సర్వసభ్య సమావేశంలో పాల్గొంటారు. మధ్యాహ్నం 2 గంటల నుంచి ఇచ్చాపురం, పలాస, టెక్కలి, పాతపట్నం, పాలకొండ నియోజకవర్గాల సమీక్ష సమావేశాలు జరగనున్నాయి. మంగళవారం ఉదయం 10 గంటల నుంచి శ్రీకాకుళం, ఆమదాలవలస, రాజాం, ఎచ్చెర్ల, నరసన్నపేట నియోజకవర్గాల సమీక్షలు చంద్రబాబు చేస్తారని కళావెంకట్రావు చెప్పారు.

ఇదీ చూడండి:

'21, 22 తేదీల్లో సిక్కోలులో చంద్రబాబు పర్యటన'