అనిశా అధికారినంటూ ఒకరిని మోసం చేసి డబ్బులు డిమాండ్ చేసిన ఘటన శ్రీకాకుళం జిల్లా పాతపట్నంలో జరిగింది. పోలీసులు తెలిపిన వివరాల ప్రకారం.. పాతపట్నం ప్రభుత్వాసుపత్రిలో తిరుపతిరావు, అప్పలనాయుడు అనే ఇద్దరు వ్యక్తులు ల్యాబ్ అసిస్టెంట్లుగా పని చేస్తున్నారు. వీరిద్దరూ ప్రైవేటుగా ల్యాబులు నడుపుతున్నారు. ఈ క్రమంలో అప్పలనాయుడు తనకు పోటీగా ఉన్నాడని తిరుపతిరావు భావించాడు.
ఇదిలా ఉండగా ఇటీవల అనిశా అధికారులు తనిఖీలు నిర్వహించి వీరిద్దరూ ప్రభుత్వాసుపత్రిలో పనిచేస్తూ... ప్రైవేటుగా ల్యాబులు పెట్టుకున్నట్లు గుర్తించారు. వారిపై కేసు నమోదు చేశారు. దీనిగురించి ఈనెల ఒకటో తేదీన వారిని విచారణ కోసం అధికారులు శ్రీకాకుళం పిలిపించారు. ఈ క్రమంలో అప్పలనాయుడిని బెదిరించాలని తిరుపతిరావు ఆలోచించాడు. తన స్నేహితుడైన విశ్రాంత సైనికోద్యోగి మురళీకృష్ణ సహకారంతో ప్రణాళిక వేశాడు.
తిరుపతిరావు చెప్పిన ప్రకారం మురళీకృష్ణ అప్పలనాయుడుకు ఫోన్ చేసి తాను అనిశా అధికారినని రూ. 2 లక్షలు ఇస్తే నీపై ఉన్న కేసు కొట్టేస్తానని అన్నాడు. ఇలా పలుమార్లు ఫోన్ చేసి బెదిరింపులకు పాల్పడ్డాడు. అనుమానం వచ్చిన అప్పలనాయుడు పోలీసులను ఆశ్రయించాడు. పోలీసుల సలహా ప్రకారం డబ్బులిస్తానని చెప్పి మురళిని చల్లవానిపేట రావాలని కోరాడు. నగదు కోసం వచ్చిన అతడిని పోలీసులు అదుపులోకి తీసుకున్నారు. విచారణలో ల్యాబ్ నిర్వాహకుడు తిరుపతి ఉన్నట్లు గుర్తించి అతడిని అరెస్ట్ చేశారు. వారిద్దరికీ కోర్టు 14రోజుల రిమాండ్ విధించినట్లు ఎస్ఐ తెలిపారు.
ఇవీ చదవండి...
