వినూత్నం... విందులో మట్టిపాత్రల వినియోగం

విందుల్లో, శుభకార్యాల్లో ప్లాస్టిక్ గ్లాసుల వినియోగం ఎక్కువగా ఉంటుంది. ఒక్కసారి వాడి పాడేసే ఈ ఉత్పత్తుల వల్ల అటు ఖర్చుతో పాటు పర్యావరణానికి కలిగే నష్టం ఎక్కవే. అదే మట్టి పాత్రలు వినియోగిస్తే ఖర్చును తగ్గించడమే కాక.. పర్యావరణానికి మేలు చేసినట్లు ఉంటుంది. ఇలాంటి ఆలోచనే చేసింది ఓ గణేష్ ఉత్సవ కమిటీ.

శ్రీకాకుళం జిల్లా పాలకొండ నగర పంచాయతీ పరిధిలోని జిక్కివారి వీధిలోని గణేష్ ఉత్సవ కమిటీ వినూత్నంగా ఆలోచించింది. విందు కార్యక్రమాల్లో భక్తులకు తాగునీటిని మట్టి పాత్రల్లో అందిస్తూ ఆదర్శంగా నిలుస్తోంది. ఐదు రోజులుగా ఈ వీధిలో వినాయక మహోత్సవాలు నిర్వహిస్తున్నారు. శనివారం అన్నదానం నిర్వహించారు. ఇలాంటి వేడుకల్లో తాగునీటి కోసం ప్లాస్టిక్ గ్లాసులను వినియోగించడం పరిపాటి. అయితే ఇవి పర్యావరణానికి హాని కలిగిస్తాయని కమిటీ సభ్యులు చిన్నపాటి మట్టి పాత్రలను వినియోగించారు. వాటితోనే భక్తులకు తాగునీటిని అందించారు. పర్యావరణ పరిరక్షణ కోసమే మట్టి పాత్రలు ఏర్పాటు చేసినట్టు బాల గణపతి కమిటీ సభ్యులు తెలిపారు.