విషాన్ని చిమ్మడంలో కాస్త వెనకేే ఉంటుందేమోగానీ.. తన ఆకారంతో జనాన్ని భయపెట్టడంలో మాత్రం ముందు వరసలోనే ఉంటుంది కొండచిలువ. భారీ పొడవుతో భయంకరంగా కనిపించే.. ఈ పామును చూస్తే ఎవరికైనా గుండెలు జారిపోవాల్సిందే. అలాంటి కొండచిలువ ప్రకాశం జిల్లా మార్టూరు మండలం కోలలపూడి గ్రామస్తులను హడలెత్తించింది.
గ్రామానికి కూతవేటు దూరంలో ఉన్న సాగర్ కాలువ దగ్గరలో సుమారు పది అడుగుల కొండ చిలువ ప్రయాణికుల కంటపడింది. కొండచిలువ కనిపించిన సమీపంలోనే పశువుల పాక ఉంది. అందులో గొర్రెల మంద ఉండటంతో.. జీవాల పోషకులు ఆందోళనకు గురయ్యారు. రాత్రంతా గొర్రెలను చూసుకుంటూనే కూర్చున్నారు.
అటవీ ప్రాంతం దగ్గరగా ఉండడంతో తరచూ ఇలాంటి పాములు గ్రామంలోకి వస్తున్నాయని స్థానికులు చెబుతున్నారు. గతంలోనూ గ్రామంలోకి భారీ కొండచిలువ వచ్చిన విషయాన్ని గ్రామస్థులు గుర్తుచేసుకున్నారు. ఇక, సాగర్ కాల్వమీదుగా ఉన్న రోడ్డుపై ప్రయాణిస్తున్న వారు కాసేపు ఆగి, కొండచిలువను సెల్ఫోన్లో బంధించారు.
ఇదీ చూడండి: ROAD ACCIDENT: స్కార్పియోను ఢీకొట్టిన టిప్పర్‌... ఇద్దరు మృతి, ఏడుగురికి గాయాలు
