కూరగాయలూ పోషకాహార నిధులే

కొవిడ్ కుదుపుకు కుదేలైన ప్రజలు పోషకాహారం వైపు పరుగులు తీస్తున్నారు. అప్పు చేసైనా ఖర్చులకు వెనకాడకుండా వెచ్చిస్తూ.. చిక్కులు కొని తెచ్చుకుంటున్నారు. ఆయా కాలాల్లో దొరికే పళ్లు, కూరగాయలను మించి పోషకాలు మెండుగా ఉన్న పదార్థాలు లేవని తెలుసుకోలేకపోతున్నారు. తక్కువ ధరలోనే శరీరానికి కావలసిన లవణాలు అందిస్తూ.. రోగనిరోధక శక్తిని పెంచుకోవచ్చని అర్థం కావడం లేదు.

కరోనా కాటు - అధిక ధరలతో జనంపై భారం

కరోనా ధాటికి ప్రజల జీవనవిధానం చిన్నాభిన్నమైంది. ఎంతో మంది ఉద్యోగాలు పోయి.. పూటగడవని పరిస్థితులు తలెత్తాయి. నిత్యావసరాలతోపాటు కూరగాయల ధరలు సామాన్యుడి నడ్డి విరిచే విధంగా ఉన్నాయి. టమోట, ఉల్లిపాయ, బంగాళ దుంపల రేట్లు పెరిగిపోగా.. కిలో కొనుగోలు చేసే చోట అరకిలో తీసుకుంటున్నామని వినియోగదారులు పేర్కొంటున్నారు. వెల చూసి బెదిరిపోవాల్సిన పని లేదని నిపుణులు భరోసా ఇస్తున్నారు. తక్కువ ధరలోనూ పోషకాలు ఎక్కువగా లభించే సీజనల్ కూరగాయలను విరివిగా తీసుకోవచ్చని సూచిస్తున్నారు.

ఆదాయం కోత...పోషకాల వేట

2001 జనాభా లెక్కల ప్రకారం.. ప్రకాశం జిల్లాలో 8.60 లక్షల కుటుంబాలు ఉన్నాయి. టమోట, ఉల్లిపాయలు, బంగాళ దంప, క్యారెట్ మొదలగు పంటలు.. మహారాష్ట్ర, తెలంగాణ, తమిళనాడు నుంచి దిగుమతయ్యేవి. ఏడాదికేడాది స్థానికంగా కూరగాయల సాగు, ఇతర రాష్ట్రాల నుంచి ఉత్పత్తి తగ్గడంతో ధరలు విపరీతంగా పెరుగుతున్నాయి. గత ఆరు నెలల్లోనే కూరగాయల ధరలు దారుణంగా పెరిగాయి. వ్యాపారాలు నిలిచిపోయి, పనులు లేక అనేక మందికి ఆదాయంలో కోత పడింది. రోగనిరోధకశక్తిని పెంచుకుంటేనే కరోనా నుంచి తప్పించుకోవచ్చంటూ చాలామంది పోషకాహారానికి ప్రాధాన్యత ఇస్తున్నారు. రోజువారీ ఖర్చులపై నియంత్రణ లేక అప్పులు చేసి మరి వాడేస్తున్నారు.

మార్చి-అక్టోబర్ మధ్య ధరల వ్యత్యాసం
కూరగాయలు	మార్చి-2020	అక్టోబర్-2020
టమోట	15	38
బీరకాయ	30	45
వంకాయ	28	40
బంగాళదుంప	30	45
దొండకాయ	25	45
మిర్చి	30	55
ఉల్లిపాయ	18	50
క్యారెట్	50	80
కాకర	30	50
బెండ	30	45

కుటుంబం పై అదనపు భారం:

ఒంగోలు నగరానికి చెందిన కృష్ణా రెడ్డిది ఐదుగురు సభ్యులున్న చిన్న కుటుంబం. కరోనా ముందుతో పోలిస్తే దాదాపు రూ. 1400 అదనపు ఖర్చు మీద పడుతుంది. ఏమి తినాలన్నా ఒకటికి రెండుసార్లు ఆలోచించాల్సి వస్తుందని ఆయన వాపోయాడు.

ధర తక్కువైనా పోషకాలు మెండు:

"పస్తుత పరిస్థితుల్లో క్రమం తప్పకుండా మంచి నీరు, రోజూ వ్యాయామంతో పాటు పోషకాహారానికి ప్రాధాన్యత ఇవ్వాలి. ఆహారం పరంగా ఇదే తినాలి అన్న నిబంధనలేమీ లేవు. రోజుకు వంద గ్రాముల ఆకుకూరలు, 50 గ్రాముల కూరగాయలు శరీరానికి అవసరం. దోస, పొట్ల, సొర, బీర లాంటి తీగ సంబంధిత కాయల్లో ఒకేరకమైన పోషకాలు ఉంటాయి. పప్పుదినుసులు, పుట్టగొడుగుల్లో ప్రతి 100 గ్రాములకు 25 గ్రాముల ప్రోటీన్ ఉంటుంది. తోటకూర, గోంగూర, కాల్షియం, క్యారెట్​లలో విటమిన్-ఎ, పీచు పదార్థాలు లభిస్తాయి. పచ్చిబఠాణీ, మునగాకు, కాయల్లో పోషకాలు ఎక్కువగా ఉంటాయి". - కె నాగేశ్వరరావు, సీనియర్ వైద్య నిపుణులు

ఇదీ చదవండి: 'గిరిజనుల స్థితి గతులపై సమగ్ర సర్వే అవసరం'