వైకాపా ఎమ్మెల్యే కోటంరెడ్డి అరెస్టు ఓ బూటకం: వర్ల

నెల్లూరు రూరల్ ఎమ్మెల్యే కోటంరెడ్డి శ్రీధర్ రెడ్డి అరెస్టు బూటకమని తెదేపా నాయకుడు వర్ల రామయ్య విమర్శించారు. ఓ అధికారిణి ఇంటిపై దౌర్జన్యం చేసిన వ్యక్తిపై సాధారణ సెక్షన్ల కింద కేసు నమోదు చేయటం ఏంటని ప్రశ్నించారు.

ఎంపీడీవో సరళ ఇంటిపై దౌర్జన్యం కేసులో వైకాపా ఎమ్మెల్యే కోటంరెడ్డి శ్రీధర్‌రెడ్డికి బెయిల్ మంజూరు చేయటంపై తెలుగుదేశం పార్టీ నాయకుడు వర్ల రామయ్య మండిపడ్డారు. తెల్లవారు జామున కోటంరెడ్డిని అరెస్ట్ చేసిన పోలీసులు 5 గంటల్లోనే బెయిల్​పై విడుదల చేయటం దుర్మార్గమని అన్నారు. ఎవరి ఆదేశాలతో పోలీసులు ఈ బూటకపు అరెస్టు నాటకాన్ని రక్తి కట్టించారో చెప్పాలని డిమాండ్ చేశారు. ఎమ్మెల్యేపై సాధారణ సెక్షన్ల కింద కేసు నమోదు చేసి ప్రజలను మభ్యపెట్టారని ఆరోపించారు. ప్రభుత్వ అధికారిణిపై ఓ శాసనసభ్యుడి రాద్ధాంతం ఘటనలో ముఖ్యమంత్రి జగన్మోహన్ రెడ్డి ఘోరంగా విఫలమయ్యారని విమర్శించారు.