వివరాలు వెల్లడిస్తున్న ఎస్పీ
నెల్లూరులో ఇద్దరు దొంగలను పోలీసులు అరెస్ట్ చేశారు. వీరి నుంచి ఐదు కార్లతో పాటూ 250 గ్రాముల బంగారు ఆభరణాలు, అర కిలో వెండిని స్వాధీనం చేసుకున్నారు. తోటపల్లి గూడూరు మండలానికి చెందిన అశోక్ కుమార్ రెడ్డి పలువురు దగ్గర కార్లను అద్దెకు తీసుకొని.. తిరిగి ఇవ్వకుండా ఇతరులకు అమ్ముకుంటూ జల్సాలు చేసేవాడని నెల్లూరు జిల్లా ఎస్పీ ఐశ్వర్య రస్తోగి తెలిపారు. ఈ విషయంపై కేసు నమోదైనందున అశోక్ రెడ్డిని పోలీసులు అరెస్ట్ చేసి 5 కార్లను స్వాధీనం చేసుకున్నారు. మరో కేసులో పలు ఇళ్లలో చోరీలకు పాల్పడ్డ ఇంటి సతీష్ అనే దొంగనూ అరెస్ట్ చేశారు. అతని వద్ద నుంచి ద్విచక్ర వాహనం, 250 గ్రాముల బంగారు ఆభరణాలు, అరకిలో వెండిని స్వాధీనం చేసుకున్నారు. ఈ కేసుల్లో దొంగలను పట్టుకునేందుకు ప్రతిభ కనపరిచిన పోలీస్ సిబ్బందికి ఎస్పీ ఐశ్వర్య రస్తోగి రివార్డులు అందజేశారు.
