శ్రీ పొట్టి శ్రీరాములు నెల్లూరు జిల్లా కావలి పట్టణంలోని పాతవూరు శేషాద్రి రైస్ మిల్లులో భారీ మొత్తంలో రేషన్ బియ్యం పట్టుపడ్డాయి. పక్కా సమాచారంతో సివిల్ సప్లై జిల్లా అధికారి వెంకటేశ్వర్లు కావలి అధికారులతో కలిసి రైస్ మిల్లులో తనిఖీ చేశారు. అప్పటికే లారీల్లో సుమారు 600 బస్తాలు ఉండగా మిల్లులో మరో 400 బస్తాల బియ్యం నిల్వ ఉంచినట్లు గుర్తించారు. దీంతో పాటు పెద్ద కుప్పగా ఉన్న రేషన్ బియ్యాన్ని గుర్తించారు. అయితే అవి ఎన్ని బస్తాలు ఉంటాయో లెక్కించాల్సి ఉందని అధికారులు తెలిపారు. సుమారు 1,500 బస్తాలు ఉండొచ్చని అధికారులు అంచనా వేస్తున్నారు. దీంతో పాటు పట్టుబడిన బియ్యం విలువ సుమారు పది లక్షలు రూపాయలు ఉండొచ్చని తెలిపారు. మిల్లు యజమానిపై 6ఏ కేసు నమోదు చేసి మిల్లును సీజ్ చేసినట్లు అధికారులు తెలిపారు. ఇంత భారీ మొత్తంలో బియ్యం.. ఎక్కడి నుంచి తీసుకు వచ్చారు అనేదానిపై అధికారులు విచారణ జరుపుతున్నారు.
25 టన్నుల రేషన్ బియ్యం పట్టివేత.. ఇద్దరు నిందితులు అరెస్టు
చిత్తూరు జిల్లా కుప్పంలో వైసీపీకి చెందిన ఓ వ్యాపారి రైస్ మిల్లులో సోమవారం విజిలెన్స్ అధికారులు సోదాలు చేశారు. ఈ సోదాలో 25 టన్నుల రేషన్ బియ్యం పట్టుబడ్డాయి. బియ్యాన్ని స్వాధీనం చేసుకున్న పోలీసులు ఇద్దరు నిందితులను అదుపులోకి తీసుకున్నారు. పోలీసుల సమాచారం ప్రకారం.. కుప్పం మున్సిపాలిటీ పరిధి బైరుగాని పల్లి వద్ద అధికార పార్టీకి చెందిన ఓ వ్యాపారి రైస్ మిల్లు నిర్వహిస్తున్నాడు. అతడు రేషన్ బియ్యాన్ని మిల్లులో పాలిష్ చేసి ఎగుమతి చేస్తున్నట్లు విజిలెన్స్ అధికార్లకు సమాచారం అందింది. గత కొన్నేళ్ళుగా అక్రమం జరుగుతున్నట్లు గుర్తించిన అధికారులు సోమవారం ఆకస్మికంగా దాడులు నిర్వహించారు. తరలింపునకు సిద్ధంగా ఉన్న 25 టన్నుల బియ్యంతో పాటు లారీని అధికారులు స్వాధీనం చేసుకున్నారు. ఈ ఘటనలో సదరు వ్యాపారితో పాటు మరొక నిందితుడిని అరెస్టు చేసిన పోలీసులులు కేసు నమోదు చేశారు.
2 కిలోల గంజాయి పట్టివేత.. ఓ సాఫ్ట్వేర్ ఉద్యోగితో పాటు నలుగురు నిందితులు అరెస్టు..
ప్రకాశం జిల్లాలో గంజాయిని రహస్యంగా కనుగోలు చేసి ఇంటికి తీసుకుని వచ్చి రోజూ వాటిని తాగుతున్నారు ఐదుగురు యువకులు. సమాచారం అందిన వెంటనే సోదాలు చేసిన పోలీసులు 1,850 గ్రాముల గంజాయిని స్వాధీనం చేసుకున్నారు. ఈ ఘటనలో ఐదుగురు నిందితులను పొన్నూరు పట్టణ పోలీసులు అదుపులోకి తీసుకున్నారు. అయితే వారిలో ఓ సాఫ్ట్వేర్ ఎంప్లాయ్ కూడా ఉండటం విశేషం. అసలేం జరిగిందంటే?..
పోలీసులు తెలిపిన వివరాల ప్రకారం.. నిడుబ్రోలుకు చెందిన సురేశ్, పొన్నూరు పట్టణానికి చెందిన హరిబాబు, గోపి, మాణిక్యరావు లు పచ్చలతాడిపర్రు గ్రామానికి చెందిన సుబ్బారావు అనే సాఫ్ట్వేర్ ఉద్యోగి అయిన సుబ్బారావు కలిసి రెండు కిలోల గంజాయిని కనుగోలు చేశారు. వారు ఆ గంజాయిని విశాఖ ఏజెన్సీ ప్రాంతం నుంచి తీసుకుని వచ్చిన ఇంట్లో రహస్యంగా దాచి ఉంచారు. ఈ ఐదుగురు నిందితులు రోజూ గంజాయిని తాగుతున్నారు. ఈ సమాచారం అందిన వెంటనే పోలీసులు.. గంజాయిని దాచి పెట్టిన ఇంట్లో సోదా చేశారు. పోలీసుల సోదాలో 1,850 గ్రాముల గంజాయి పట్టుబడింది. గంజాయిని స్వాధీనం చేసుకున్న పోలీసులు నిందితులను అదుపులోకి తీసుకున్నట్లు సీఐ బాబీ తెలిపారు.
బోల్తా పడిన ట్రాక్టర్.. 12 మందికి గాయాలు..
కర్నూలు జిల్లా పెద్దకడబురు మండలం ఎలెల్సీ కాలువ దగ్గర కూలీలతో వెళ్తున్న ట్రాక్టర్ బోల్తా పడింది. ఈ ప్రమాదంలో 12 మందికి గాయాలు అయ్యాయి. వెంటనే స్థానికులు.. క్షతగాత్రులను చికిత్స మేరకు ఆదోని ఆసుపత్రికి తరలించారు. ఈ రోజు సాయంత్రం కూలి పనులు ముగించుకుని ఇంటికి వెళ్తున్న సమయంలో ప్రమాదం జరిగిందని బాధితులు తెలిపారు. ఈ ఘటనపై పెద్దకడుబూరు పోలీసులు కేసు నమోదు చేసి దర్యాప్తు చేపట్టారు.
