రాష్ట్ర వ్యాప్తంగా దీపావళి సంబరాలు అంబరాన్నంటాయి. దివ్వెల వెలుగులతో తెలుగు లోగిళ్లు ప్రత్యేక శోభను సంతరించుకున్నాయి. లక్ష్మీ దేవికి ప్రత్యేక పూజల అనంతరం... చిన్నా, పెద్దా అంతా కలిసి ఆనందోత్సహాలతో బాణాసంచా కాలుస్తూ సందడి చేశారు. కొన్ని చోట్ల పర్యావరణ హితంగా దీపాలు మాత్రమే వెలిగించి వేడుక చేసుకున్నారు.
గుంటూరులో నరకాసుర దహనం
గుంటూరు జిల్లాలో ప్రజలు దీపావళిని ఉత్సాహంగా చేసుకున్నారు. బాపట్లలోని 18 అడుగుల నరకాసుర దహన కార్యక్రమంలో ఏపీ ఉపసభాపతి కోన రఘుపతి పాల్గొన్నారు. ఈ పండుగ ప్రతి ఒక్కరి జీవితంలో వెలుగులు నింపాలని ఆకాంక్షించారు.
విశాఖలో ఘనంగా
విశాఖ వాసులు దీపాల పండుగను ఉత్సాహంగా జరుపుకొన్నారు. ఇంటి ముందు విభిన్న ఆకృతుల్లోని ప్రమిదల్లో దీపాలు పెట్టి వాటిని పువ్వులతో అందంగా అలంకరించారు. పిల్లలు, పెద్దలు అంతా కలిసి బాణాసంచా కాలుస్తూ సందడి చేశారు. అయితే ఈసారి టపాసుల ధరలు వినియోగదారులకు మోత మోగించాయి.
తూర్పుగోదావరిలో పండుగ సందడి
తూర్పుగోదావరిలో దీపావళి సంబరం అంబరాన్నంటింది. పి.గన్నవరంలో చిన్నారులు లక్ష్మీ పూజలు చేశారు. ప్రజలు కుటుంబాలతో కలిసి ఉత్సాహంగా బాణాసంచా కాల్చారు.
కర్నూలు జిల్లాలో పండుగను ప్రజలు ఉత్సాహంగా చేసుకున్నారు. ఈసారి టపాసుల అధిక ధరలు వినియోగదారులకు చుక్కలు చూపించాయి. చిత్తూరు జిల్లాలో లోగిళ్లు దీపాలతో కళకళలాడాయి. మహిళలు ఆలయాల్లో ప్రత్యేక పూజలు చేశారు. లక్ష్మీపూజ అనంతరం బాణాసంచా కాల్చారు. నెల్లూరు జిల్లాలో దివ్వెల పండుగను ప్రజలంతా ఉత్సాహంగా చేసుకున్నారు. నాయుడు పేటలోని పాఠశాల ఆవరణలో దీపాలతో అలంకరించిన ముగ్గులు ప్రత్యేక ఆకర్షణగా నిలిచాయి.
ఇదీ చదవండి:
