నెమ్మదించిన కొవిడ్ రెండో దశ.. థర్డ్ వేవ్ ఎదుర్కొనేందుకు ప్రణాళికలు

కొవిడ్ రెండో దశ ఉద్ధృతి కొంత నెమ్మదించడం వల్ల ప్రభుత్వాసుపత్రుల్లో కరోనా బాధితుల తాకిడి తగ్గుముఖం పట్టింది. అయితే మూడోదశ హెచ్చరికల నేపథ్యంలో ఒంగోలు జీజీహెచ్(ggh ongole)​ అధికారులు మాత్రం ఇప్పటినుంచే వైరస్ కట్టడికి పక్కా ప్రణాళికలు సిద్ధం చేస్తున్నారు. పిల్లలపై ఎక్కువ ప్రభావం చూపే అవకాశం ఉందన్న అంచనాల దృష్ట్యా పీడియాట్రిక్ వార్డుల ఏర్పాటు, నిపుణుల నియామకం చేపడుతున్నారు.

ఒంగోలు జీజీహెచ్​లో(GGH ONGOLE) కొవిడ్ బాధితుల సంఖ్య రోజురోజుకూ తగ్గుముఖం పడుతోంది. చాలా మంది బాధితులు డిశ్చార్జ్ అవుతున్నారు. పడకలు ఖాళీ అవుతున్నాయి. మూడో దశ వస్తే ఎదుర్కోవడమెలాగనే అంశంపై యంత్రాంగం దృష్టి సారిస్తోంది. ఎక్కువ కేసులొస్తే సరిపడా పడకలు, ఆక్సిజన్ ఉండేలా చూసుకుంటున్నారు. జీజీహెచ్​లో ప్రస్తుతం రెండు ప్లాంట్ల ద్వారా 30 కిలోలీటర్ల ఆక్సిజన్‌ ఉత్పత్తి చేసే సదుపాయం ఉంది. మూడో దశ(covid 3rd wave) దృష్ట్యా ఈ సామర్థ్యాన్ని పెంచాలని భావిస్తున్నారు.

జర్మన్ హ్యాంగర్ విధానంలో 100 పడకలు

జీజీహెచ్(GGH)​లో ప్రస్తుతం 12 వందల 90 పడకలు ఉండగా.. సుమారు వెయ్యి బెడ్స్‌కు ఆక్సిజన్ సౌకర్యముంది. వీటికి తోడు అదనపు పడకల ఏర్పాటుకు ప్రణాళికలు రచిస్తున్నారు. వైద్యకళాశాల మైదానంలో ఆక్సిజన్, ఏసీ సౌకర్యాలతో సుమారు 100 పడకల సామర్థ్యంతో జర్మన్ హ్యాంగర్ విధానంలో వార్డు ఏర్పాటు చేశారు. కొత్త వార్డు ఏర్పాటుతో పాటు మూడో ముప్పును ఎదుర్కోవడానికి అన్నివిధాలుగా సన్నద్ధమవుతున్నట్లు అధికారులు చెబుతున్నారు.

ఇదీ చదవండి..