Odisha Lorry Association Leaders Filled Road Potholes in AP: ఏపీ ప్రభుత్వానికి సిగ్గు చేటు.. రాష్ట్రంలోని ఓ రహదారి మరమ్మతులు చేసిన ఒడిశా లారీ అసోసియేషన్​

Odisha Lorry Association Leaders Filled Road Potholes in AP: ఆంధ్ర ఒడిశా సరిహద్దులోని రాష్ట్ర రహదారి గుంతలమయం కాగా.. ఒడిశాకు చెందిన లారీ అసోసియేషన్​ నాయకులు గుంతలను పూడ్చారు. అధికారులకు ఎన్నిసార్లు మొరపెట్టకున్న పట్టించకోవటం లేదని వారు వివిరించారు.

Odisha Lorry Association Leaders Filled Road Potholes in AP: రాష్ట్రంలోని ఓ రహదారికి ఒడిశా రాష్ట్రానికి చెందిన లారీ అసోసియేషన్​​ నాయకులు మరమ్మతులు నిర్వహించారు. ఏపీ ప్రభుత్వ తీరుతో విసుగు చెంది.. తమ వాహనాలు దెబ్బతింటున్నాయని స్వయంగా వారే ఈ చర్యకు పూనుకున్నారు. రోడ్ల దుస్థితిపై నిరసన చేపట్టితే.. అధికారులు నిరసన తెలిపిన ప్రాంతాల్లో గుంతలు పూడ్చి వదిలేస్తున్నారని శాశ్వత పరిష్కారం చూపటం లేదని లారీ అసోసియేషన్​​ నాయకులు అన్నారు.

పార్వతీపురం మన్యం జిల్లాలోని కొమరాడ, బంగారంపేట, కునేరు గ్రామాల్లో రోడ్లు అధ్వాన్నంగా తయారయ్యాయి. ఈ రహదారిపై.. అంతరాష్ట్రాల వాహనాలు రాకపోకలు సాగిస్తుంటాయి. ముఖ్యంగా ఒడిశా రాష్ట్రానికి చెందిన వాహనాలు ఏపీకి, ఏపీ నుంచి వాహనాలు ఒడిశాకు ఈ దారి గుండానే తిరుగుతుంటాయి. కునేరు గ్రామ పరిధిలో రహదారి పూర్తిగా ధ్వంసమైంది. భారీ పరిమాణంలో రోడ్డుపై గుంతలు ఏర్పడ్డాయి.

రోడ్డు మరమ్మత్తులకు గురి కావటంతో.. ఒడిశా లారీ యాజమానులు పార్వతీపురం జిల్లా కలెక్టర్​కు గ్రీవెన్స్​లో ఫిర్యాదు చేశారు. అంతేకాకుండా ఆర్​ అండ్​ బీ అధికారులకు తెలియజేశారు. అధికారులు స్పందించకపోవటంతో.. వారు పలుమార్లు నిరసనకు దిగారు. దీంతో నిరసనకు దిగిన సమాయాల్లో అధికారులు తూతూ మంత్రంగా నామమాత్రపు చర్యలకు దిగారు.

రోడ్డు మరమ్మతుల పనులు చేపట్టకపోవటంతో.. విపరీతమైన ట్రాఫిక్​ సమస్యలు ఎదుర్కోంటున్నామని అటుగా వెళ్తున్న వాహనాదారులు అంటున్నారు. గుంతల వల్ల రోడ్డు ప్రమాదాలు సైతం సంభవిస్తున్నాయని వివరించారు. రోడ్డుపై దుమ్ము చెలరేగి ఎదురుగా వస్తున్న వాహనాలు కనిపించటం లేవని అన్నారు. ధ్వంసమైన రోడ్ల వల్ల వాహనాలు పాడైపోతున్నాయని వాపోయారు. ఈ రోడ్ల వల్ల తీవ్రమైన ఇబ్బందులు ఎదుర్కొంటున్నట్లు వారు వివరించారు.

ఒడిశా రాష్ట్రంలోని రాయగడకు చెందిన లారీ యాజమానులు ఈ సమస్యపై పలుమార్లు అధికారులకు విన్నవించుకున్న స్పందించకపోవటంతో స్వయంగా వారే రంగంలోకి దిగారు. సొంత నిధులు సమాకూర్చికుని రోడ్డుపై ఏర్పడిన గుంతలను పూడ్చేందుకు సిద్ధమయ్యారు. ఈ క్రమంలో రోడ్డును తవ్వించి.. కంకర పోసి చదును చేయించారు. రోడ్లపై గుంతలు లేకుండా పూర్తిగా కంకర పోసి పూడ్చారు.

అధికారులు ఇప్పటికైనా స్పందించి శాశ్వత పరిష్కారం చూపలని.. లేకపోతే తమ వాహనాలు పూర్తిగా ధ్వంసమవుతాయని వారు అన్నారు. ఈ కార్యక్రమంలో పాల్గొన్న సీపీఎం నాయకులు పాల్గొన్నారు. అధికారులు చొరవ చూపి గుంతలను పూర్తిగా పూడ్చివేసే ప్రక్రియ చేపట్టాలని సీపీఎం కోరారు. ఈ రోడ్డును బాగు చేసి ఒడిశా రాష్ట్రానికి వెళ్లే ప్రజల కష్టాలను తీర్చాలని అన్నారు.