Damaged Bridge at Pedamadduru Palnadu District: నిధుల గండంతో ప్రమాదకరంగా వంతెన.. ప్రయాణికుల ప్రాణాలు అరచేతిలో!

Damaged Bridge at Pedamadduru Palnadu District: రాష్ట్రం అభివృద్ధి పథంలో దూసుకుపోతుంది, ప్రజలు సుపరిపాలన అందిస్తున్నామని సందు దొరికినప్పుడల్లా మనం సీఎం సారు ఊదరగొడుతుంటారు. కానీ వాస్తవ పరిస్థితుల్లో మాత్రం పాడైన వంతెనల స్థానంలో కొత్త వాటిని నిర్మించలేని దుస్థితిలో ప్రభుత్వం ఉంది. పల్నాడు జిల్లాలోని అమరావతి నుంచి విజయవాడ వెళ్లే మార్గంలోని వంతెనే అందుకు నిదర్శనం. వంతెన పూర్తిగా దెబ్బతినడంతో ఎప్పుడు ఏ ప్రమాదం జరుగుతుందోనని ప్రజలు బిక్కుబిక్కుమంటూ ప్రయాణించాల్సిన దుస్థితి ఏర్పడింది.

Damaged Bridge at Pedamadduru Palnadu District : అమరావతి- విజయవాడ మధ్య ప్రధాన రహదారిపై (Amaravati to Vijayawada Main Road) పెదమద్దూరు వద్ద వాగుపై వంతెన తీవ్రంగా దెబ్బతింది. పాత వంతెన శిథిలావస్థకు (Bridge Dilapidated) చేరటంతో ప్రయాణికులు, వాహనదారులు కొన్నేళ్లుగా ఆందోళన చెందుతున్నారు. ఇప్పుడు ఆ వంతెన ఓ వైపు కుంగిపోయింది. పది మీటర్లకు పైగా పొడవున దెబ్బతినటంతో వాహనదారులు వెళ్లటానికి ఇబ్బందులు ఏర్పడుతున్నారు. ఇప్పటికే రక్షణ గోడలు దెబ్బతినడంతో వాహనాలు నెమ్మదిగా వెళ్తున్నాయి. వంతెన నుంచి అప్రోచ్ రోడ్డు కూడా గుంతలమయంగా మారింది.

Bridge on Main Road from Amaravati to Vijayawada is Dilapidated : వంతెన కాలం తీరటంతో అక్కడ కొత్త వంతెన కోసం ప్రభుత్వం ఆమోదం తెలిపింది. రూ.44 కోట్లతో వంతెనతో పాటు రహదారి నిర్మాణానికి 2022 అక్టోబర్ 27వ తేదిన శంకుస్థాపన జరిగింది. ఏడాదిలో పూర్తి చేయాలని గడువు నిర్దేశించారు. పునాదులు తవ్వటంతో పాటు కొంతమేర పిల్లర్ల నిర్మాణం కూడా జరిగింది. అయితే గుత్తేదారుకు బిల్లులు చెల్లించకపోవటంతో పనులు నత్తనడకన సాగాయి. బకాయిలు పేరుకుపోవటంతో గుత్తేదారు 2నెలల క్రితమే పనులు ఆపేశారు. సజావుగా పనులు జరిగి ఉంటే మరి కొద్ది నెలల్లో వంతెన నిర్మాణం పూర్తై ఉండేది.

Government not Funding to Bridge at Pedamadduru : ప్రభుత్వం నుంచి నిధులు రాకపోవటంతో గుత్తేదారులు పనులు నిర్వహించలేని పరిస్థితి ఏర్పడింది. కొత్త వంతెన అందుబాటులోకి రాకమునుపే.. పాత వంతెన కుంగిపోవటం ఇబ్బందిగా మారింది. ఈ మార్గంలో భారీ వాహనాలు కూడా వెళ్తుంటాయి. ముఖ్యంగా అమరావతి నుంచి ఇసుక తరలించేందుకు కూడా రహదారి వినియోగిస్తుంటారు. వంతెన సరిగా లేకపోయినా భారీ వాహనాల రాకపోకల్ని అలాగే కొనసాగిస్తున్నారు. దీంతో వంతెన ఇప్పుడు కుంగిపోయిందని వాహనదారులు చెబుతున్నారు. ఇప్పటికైనా భారీ వాహనాలు ఆపాలని కోరుతున్నారు. అదే సమయంలో కొత్త వంతెన పనులు తిరిగి ప్రారంభించి త్వరగా పూర్తి చేయాలని విజ్ఞప్తి చేస్తున్నారు.

Bridge Dilapidated at Pedamadduru : అమరావతి నుంచి తుళ్లూరు మధ్య 18 కిలోమీటర్ల మేరకు రహదారి దారుణంగా దెబ్బతింది. కొన్నిచోట్ల రహదారి నిలువునా చీలిపోయింది. రహదారిపై తారు లేచిపోయి కంకర రాళ్లు పైకి తేలి ప్రమాదభరితంగా మారింది. ఇప్పుడు వంతెన కూడా పాడైపోయింది. గుంతల నుంచి తప్పించుకోవడానికి వాహనదారులు పడరాని పాట్లు పడుతున్నారు. పలువురు వాహనదారులు ప్రమాదాల బారిన పడ్డారు. ఒకవేళ భారీ వర్షం కురిసినప్పుడు వరద నీరు వంతెన పైనుంచి ప్రవహిస్తుంటుంది. ఆ సమయంలో రాకపోకలు నిలిపివేస్తారు. ఇప్పుడు భారీ వరద వస్తే వంతెన ఉంటుందా లేదా అన్న అనుమానాలు వ్యక్తం అవుతున్నాయి.

వంతెన పూర్తిగా ధ్వంసమయితే రాకపోకలకు వేరే మార్గం లేదని ప్రభుత్వం ఇప్పటికైనా పట్టించుకుని కొత్త వంతెనను త్వరగా పూర్తి చేయాలని ప్రజలు కోరుతున్నారు.