Paddy Cultivation Decreasing in YSRCP Government : నాగార్జునసాగర్‌ ఆయకట్టుకు నీరివ్వకపోవడంతో వరి నాట్లు పడలేదు. కృష్ణా డెల్టాలోనూ నీరందక పంటలు ఎండిపోతున్నాయి. ఉత్తరాంధ్ర ప్రాంతంలోను నీరుచేరక.. రైతులు పొలాల్ని వదిలేసిన దయనీయ స్థితి నెలకొంది. ఇలాంటి పరిస్థితుల్లో బియ్యం ధరలు ( Today Rice Price) మరింత కొండెక్కే ప్రమాదం పొంచి ఉంది. అయినా ముఖ్యమంత్రి జగన్‌ మాత్రం ఆహార పంటల ఉత్పత్తి పెరుగుతోందంటూ భుజాలు చరచుకుంటున్నారు.
YSRCP Government Careless on Paddy Farmers : వైఎస్సార్సీపీ అధికారంలోకి వచ్చిన నాటి నుంచి ఏటా అతివృష్టి, అనావృష్టితో రైతులు నష్టపోతున్నా భరోసా కల్పించే చర్యలే కొరవడ్డాయి. ఈ ఏడాది సాధారణ విస్తీర్ణంతో పోలిస్తే..6 లక్షల ఎకరాల్లో సాగు తగ్గింది. ఎకరాకు 21.50 క్వింటాళ్ల దిగుబడి ప్రకారం చూస్తే సుమారు 12 లక్షల 90వేల టన్నుల దిగుబడి తగ్గనుంది. క్వింటాల్‌కు 2వేల200 రూపాయల మద్దతు ధర ప్రకారం చూస్తే సుమారు 2వేల 800కోట్ల విలువైన పంట ఉత్పత్తి తగ్గిపోనుంది. ఎండుతున్న పంటలతో తగ్గే దిగుబడులు లెక్కలోకి తీసుకుంటే ఇది మరింత పెరగనుంది.
Crops Drying Due To Lack of Irrigation Water In Krishna Delta : రాష్ట్రంలో ఖరీఫ్‌ వరి సాగు ఆందోళనకర స్థాయికి పడిపోయింది. కొన్నేళ్ల గణాంకాలు చూస్తే ఇంత తక్కువ విస్తీర్ణంలో ఎప్పుడూ సాగైన పరిస్థితి లేదు. 2018-19 సంవత్సరంలో కరవు పరిస్థితులున్నా రాష్ట్రంలో వరి సాగు గణనీయంగా నమోదైంది. ఖరీఫ్‌లో 39 లక్షల ఎకరాల్లో వరి నాట్లు పడ్డాయి. ఈ ఏడాది కేవలం 33 లక్షల ఎకరాల్లోనే వరి సాగైంది. సాధారణ విస్తీర్ణంతో పోలిస్తే సుమారు 6 లక్షల ఎకరాలు తక్కువగా నాట్లు పడ్డాయి. నాగార్జునసాగర్‌ ఆయకట్టు పరిధిలోనే సుమారు 2లక్షల ఎకరాల్లో సాగు తగ్గింది.
నారుమళ్లను పశువుల మేతకు వదిలేసిన రైతులు : ముఖ్యంగా సాధారణ విస్తీర్ణం కంటే పల్నాడు జిల్లా 78 శాతం, ప్రకాశం జిల్లాలో 50 శాతం సాగు తగ్గిపోవడం ఆందోళనకర పరిస్థితులకు అద్దం పడుతోంది. నంద్యాల జిల్లాలో 33, YSR జిల్లాలో 32, బాపట్ల జిల్లాలో 22 శాతం విస్తీర్ణం మేర నాట్లు వేయలేదు. కృష్ణా డెల్టా చివరి భూముల్లోని ఉమ్మడి ప్రకాశం జిల్లా పరిధిలో అధికశాతం విస్తీర్ణంలో నాట్లు వేయలేదు. నారుమళ్లను పశువుల మేతకు వదిలేశారు.
నీరు లేక ఎండిపోతున్న వరి : కృష్ణా తూర్పు, పశ్చిమ డెల్టా ఆయకట్టుకు పూరి స్థాయిలో నీరందడం లేదు. ఎక్కడికక్కడే ఎండిపోతున్నాయి. విజయనగరం, విశాఖపట్నం జిల్లాల్లోనూ వరికి నీరందక రైతులు పడుతున్న పాట్లు వర్ణనాతీతం. కొన్నిచోట్ల ఎండిన పొలాలకు నిప్పు పెడుతున్నారు. సిక్కోలు జిల్లాలో వంశధార, నాగావళి, మహేంద్రతనయ వంటి నదులున్నా, సాగునీటి వ్యవస్థలు సరిగా లేక ఆయకట్టుకు నీరందని పరిస్థితి నెలకొంది. సంతబొమ్మాళి, నందిగాం, పలాస, వజ్రపుకొత్తూరు తదితర మండలాల్లో వేలాది ఎకరాల చివరి భూములకు సాగునీరందడం లేదు. వంశధార ఎడమ కాలువ పరిధిలోని నరసన్నపేట, పోలాకి మండలాల రైతులు నీటి కోసం కార్యాలయాలను ముట్టడిస్తున్నారు.
భారీగా తగ్గనున్న వరి సాగు : వంశధార ప్రాజెక్టు పరిధిలో 2 లక్షల 10వేల 510 ఎకరాల్లో పంటలు వేయగా సగం కూడా దక్కే పరిస్థితి కనిపించడం లేదు. గత నాలుగేళ్లతో పోలిస్తే వరి సాగు పెట్టుబడి 60 శాతం వరకు పెరిగింది. 2018-19లో ఎకరాకు 25 వేలు ఖర్చు చేయగా, ప్రస్తుతం 43వేల రూపాయలకు పైగా చేరింది. గోదావరి డెల్టాలో గతేడాది పంట విరామం ప్రకటించాల్సిన దయనీయ పరిస్థితులు ఎదురయ్యాయి. ఈ ఏడాది పంటవేసినా దిగుబడి భారీగా తగ్గనుంది.
తీవ్రంగా నష్టపోతున్న రైతన్నలు : కృష్ణా డెల్టాలో నీటి ఎద్దడి కారణంగా కొన్నిచోట్ల ఎకరాకు15 బస్తాలు వచ్చే పరిస్థితి లేదు. మొత్తంగా చూస్తే ఎకరాకు 20వేలకు పైగా నష్టం వస్తుందని రైతులు వాపోతున్నారు.
కరవన్నది ఎరుగని ప్రాంతంలో ఎండిపోతున్న పంటలు - ఆందోళనలో రైతన్న
