No Salaries for AP Govt Employees: ఆంధ్రప్రదేశ్‌లో ఆయా శాఖల్లో ప్రభుత్వ ఉద్యోగులుగా విధులు నిర్వర్తిస్తున్నవారికి ప్రతినెల సరైన సమయానికి జీతాలు అందక నానా అవస్థలు పడుతున్నారు. ఈ నెల జీతం ఎప్పుడొస్తుందో తెలియక అయోమయంలో ఉన్నారు. ప్రతి నెల 1వ తేదీన రావాల్సిన జీతాలు 10వ తేదీ దాటినా కూడా ఇప్పటికీ అందక అప్పులు చేస్తున్నారు. ప్రభుత్వం, ఉన్నతాధికారులు కనీసం స్పందించకపోవడంతో ఉద్యోగులు సతమతమవుతున్నారు.
ఏప్రిల్ 10 దాటినా ఖాతాలు ఖాళీ.. ఏప్రిల్ నెల ప్రారంభమై రెండు వారాలు గడిచిపోతున్నా.. ఇప్పటికీ రాష్ట్రంలోని కొన్ని శాఖల ఉద్యోగులకు రాష్ట్ర ప్రభుత్వం వేతనాలు చెల్లించలేదు. కేంద్ర ప్రాయోజిత పథకాలతో అనుసంధానమై ఉన్న నాలుగైదు శాఖల ఉద్యోగులకు ఇప్పటికీ వేతనాలు జమకాని పరిస్థితి నెలకొంది. వైద్యారోగ్య కుటుంబ సంక్షేమ శాఖ, పురపాలక, బీసీ, ఎస్సీ, ఎస్టీ సంక్షేమ శాఖలకు చెందిన ఉద్యోగులకు వేతనాలు రాని దుస్థితి ఏర్పడింది. అంతేకాదు.. ఆయా శాఖల ఉద్యోగులకు చెందిన వేతన బిల్లులను సీఎఫ్ఎంఎస్ ద్వారా అప్‌లోడ్ చేసేందుకు కూడా వెసులుబాటు కల్పించలేదు.
25వేల మంది ఎదురుచూపు... ఆంధ్రప్రదేశ్‌లో కేంద్ర ప్రాయోజిత పథకాలకు అనుబంధంగా ఉన్న ప్రభుత్వ విభాగాల్లో పనిచేస్తున్న 25వేల మంది ఉద్యోగులు ఈ నెల వేతనాల కోసం వెయ్యి కళ్లతో ఎదురుచూస్తున్నారు. ముఖ్యంగా వైద్యారోగ్య కుటుంబ సంక్షేమ శాఖ, పురపాలక పట్టణాభివృద్ధి, వ్యవసాయం, గిరిజన , వెనుకబడిన, సాంఘిక సంక్షేమ శాఖల ఉద్యోగులకు ఇప్పటికీ వేతనాలు ఇంకా జమ కాలేదు. దీంతో ఆ శాఖల ఉద్యోగులు ఆందోళన చెందుతున్నారు. ఆయా విభాగాలు కేంద్ర ప్రాయోజిత పథకాలకు అనుబంధంగా ఉండటంతో సీఎఫ్ఎంఎస్‌కు ఆన్‌లైన్‌లో అప్‌లోడ్ కాకుండా కొన్ని హెడ్‌లను ఆర్ధికశాఖ బ్లాక్ చేసి పెట్టడంతో ఏం చేయాలో అర్థంకాక అయోమయంలో పడ్డారు.
సీఎఫ్ఎంఎస్ సర్వర్‌ నియంత్రణ.. ఆయా శాఖలకు చెందిన వేతన బిల్లులు అప్‌లోడ్ కాకపోవటంతో ఏప్రిల్ నెలకు చెందిన వేతనాలు జమ కాని పరిస్థితి నెలకొంది. మరోవైపు కేంద్ర ప్రభుత్వ పథకాల నాలుగో త్రైమాసికానికి సంబధించిన లెక్కలు చెప్పకపోవటంతో 2023-24 ఆర్ధిక సంవత్సరం మొదటి త్రైమాసికానికి చెందిన నిధులు విడుదల కాలేదు. దీంతో ఆయా శాఖల ఉద్యోగులు బిల్లులు అప్‌లోడ్ చేయకుండా ఆర్ధికశాఖ ఉద్దేశపూర్వకంగానే సీఎఫ్ఎంఎస్ సర్వర్‌ను నియంత్రించినట్టు ఉద్యోగ సంఘాలు ఆరోపిస్తున్నాయి. 12 తేదీ నాటికి కూడా వేతన బిల్లులు ట్రెజరీకి చేరకపోవటంపై ఏపీ ప్రభుత్వ ఉద్యోగుల సంఘం ఆందోళన వ్యక్తం చేసింది.
అపాయింట్‌మెంట్ ఇస్తారా..? ఈ వ్యవహారంపై ఫిర్యాదు చేసేందుకు ప్రభుత్వ ప్రధాన కార్యదర్శిని అపాయింట్‌మెంట్ కోరినట్టు ఉద్యోగ సంఘం వెల్లడించింది. అయితే, ఉద్యోగుల వేతనాలకు సంబంధించి వేర్వేరు వేదికల వద్ద ఫిర్యాదులు చేస్తుండటంతో ప్రభుత్వ ప్రధాన కార్యదర్శి అపాయింట్‌మెంట్ ఇస్తారా..? లేక తాత్సారం చేస్తారా..? అన్న అంశాన్ని చెప్పలేమని సదరు ఉద్యోగ సంఘం నేతలు ఆక్షేపిస్తున్నారు. ఇప్పటికైనా సీఎం జగన్ మోహన్ రెడ్డి స్పందించి.. జీతాలు వెంటనే జమ చేయాలని వేడుకుంటున్నారు.
ఇవీ చదవండి
