పొట్టి వృక్షం... పెద్ద ఆశయం

వృక్షో రక్షతి రక్షితః సూత్రాన్ని తూ.చ. తప్పకుండా పాటిస్తున్నారామె. అభివృద్ధి పేరిట కనుమరుగైపోతున్న వృక్షాలు చూసి అందరిలా కలవరపడ్డారు. అక్కడితో ఊరుకోలేదు. 'బొన్సాయ్' పద్ధతిలో భారీ వృక్షాలను కుండీల్లో పెంచుతూ పలువురికి ఆదర్శంగా నిలుస్తున్నారు. వృక్షాల సంరక్షణపై మరికొంతమందికి తర్ఫీదునిస్తూ... పచ్చదనానికి ఊపిరి పోస్తున్నారు.

అమృత కుమార్... ఆంధ్రప్రదేశ్ జలవనరుల శాఖ ముఖ్య కార్యదర్శి శశిభూషణ్ కుమార్ సతీమణి. ఐఏఎస్ అధికారి భార్య కన్నా... బొన్సాయ్ ప్రేమికురాలిగానేఈమె సుపరిచితం. ఆమె ఇంట అడుగుపెడితే పెద్ద పెద్ద వృక్షాలు చిన్న చిన్నకుండీల్లో ఆహ్వానం పలుకుతాయి. కుండీల్లో ఉన్న బొన్సాయ్ మొక్కలు దర్శనమిస్తాయి. భర్త ఉద్యోగరీత్యా జిల్లాలు మారుతున్నా.. చెట్ల పెంపకంపై మక్కువ తగ్గలేదు అమృతకు. ఎక్కడికి వెళ్లినా తనతోపాటు పొట్టి చెట్లు తీసుకెళ్తారు.

బొన్సాయ్ మొక్కల పెంపకం ఆమెకు అలవాటు కాదు.. ఆమె జీవితంలో భాగం. అందుకే అమరావతి బొన్సాయ్ సొసైటీ స్థాపించి పొట్టి వృక్షాల ప్రేమికులందరినీ ఒకచోట చేర్చుతున్నారు. ఈ బృందంలో 40 మంది సభ్యులు ఉన్నారు. బొన్సాయ్ పెంపకం సులువు కాదు... ప్రత్యేక శిక్షణ పొందితే తప్ప వాటిని సంరక్షించడం కుదరదు. అందుకే బొన్సాయ్​పై ఆసక్తి ఉన్నవారికి ఉచిత శిక్షణ అందిస్తున్నారు. తర్వాత తరాలకు వృక్ష సంపద అందించేందుకు ఈ బృందం కృషిచేస్తోంది. వీరి కృషికి మెచ్చిన అమరావతి అభివృద్ధి సంస్థ ఎకరం స్థలం కేటాయించి ప్రోత్సహించింది.

ప్రస్తుతం విజయవాడలో ఉంటున్న అమృతకుమార్... నగరంలో ఎక్కడ ఫల, పుష్ప ప్రదర్శన జరిగినా.. బొన్సాయ్‌లతో స్టాల్ ఏర్పాటు చేస్తారు. బొన్సాయ్ అనగానే అమృతకుమార్ పేరు గుర్తొచ్చేలా సాగుతున్న ఆమె ప్రయాణం ఎంతో మందికి ఆదర్శం.