ముఖ్యమంత్రి సహాయ నిధి(సీఎంఆర్ఎఫ్) నకిలీ చెక్కుల వ్యవహారంపై పోలీసులు ముమ్మరంగా దర్యాప్తు చేస్తున్నారు. తమకు ఫిర్యాదు చేసిన రెవెన్యూ అధికారులను తుళ్లూరు పోలీసులు సోమవారం వివరాలు అడిగి తెలుసుకున్నారు. రెవెన్యూ శాఖ ఉన్నతాధికారులతోనూ తుళ్లూరు డీఎస్పీ భేటీ అయ్యారు. సచివాలయంలోని స్టేట్ బ్యాంక్ ఆఫ్ ఇండియా శాఖ అధికారులనూ పోలీసులు ప్రశ్నించారు. గతంలో సీఎంఆర్ఎఫ్ కోసం జారీ చేసిన చెక్కులకు సంబంధించిన అంశాలను అడిగి తెలుసుకున్నారు. బెంగళూరు, కోల్కతా, దిల్లీలోని స్టేట్ బ్యాంక్ ఆఫ్ ఇండియా శాఖల నుంచి నకిలీ చెక్కుల ప్రతుల్ని పోలీసులు తీసుకున్నారు.
మరోవైపు తుళ్లూరు పోలీసుల విచారణ అనంతరం ఈ కేసును సీఐడీకి ప్రభుత్వం బదిలీ చేయనున్నట్లు సమాచారం. మూడు రాష్ట్రాల పరిధిలోని అంశం కావటంతో కేసును సీఐడీకి బదిలీ చేయాలని నిర్ణయించినట్లు తెలుస్తోంది. ఉద్యోగుల పాత్రపైనా సీఐడీ అంతర్గత విచారణ చేపట్టనుంది.
జరిగింది ఇదీ...
సీఎంఆర్ఎఫ్ కింద లబ్ధిదారులకు జారీ చేసిన మూడు చెక్కులను దుండగులు ఫ్యాబ్రికేట్‌ చేసి నగదు దోచేందుకు ప్రయత్నించారు. దిల్లీ, బెంగళూరు, కోల్‌కతాలోని మూడు స్టేట్ బ్యాంక్ ఆఫ్ ఇండియా శాఖల్లో రూ.39.85 కోట్లు, రూ.52.65 కోట్లు, రూ.24.55 కోట్ల విలువ కలిగిన మూడు నకిలీ చెక్కులు సమర్పించి వాటిని నగదుగా మార్చుకునేందుకు ప్రయత్నించారు. వెలగపూడి ఎస్‌బీఐ బ్యాంకు అధికారులు ఇంత పెద్దమొత్తంలో చెక్కులు రావడాన్ని గమనించి అమరావతి సీఎం పేషీలోని సీఎంఆర్ఎఫ్ అధికారులను సంప్రదించటంతో ఆ మేరకు నగదు దుండగుల చేతికి వెళ్లకుండా ఆగింది. ఈ వ్యవహారంపై ప్రభుత్వ ఆదేశాల మేరకు వెలగపూడి సచివాలయం రెవెన్యూశాఖలో సహాయ కార్యదర్శిగా పనిచేస్తున్న పి.మురళీకృష్ణారావు ఆదివారం ఫిర్యాదు చేయగా తుళ్లూరు సీఐ ధర్మేంద్రబాబు కేసు నమోదు చేశారు.
