'వాళ్ల గురించి చెప్పినా.. తెలంగాణ ప్రభుత్వం పట్టించుకోవట్లేదు'

తెలంగాణ ప్రాంత వలస కూలీలను వారి ప్రాంతాలకు తరలించే విషయాన్ని ఆ రాష్ట్ర ప్రభుత్వానికి తెలియజేసినా పట్టించుకోలేదని హోంమంత్రి మేకతోటి సుచరిత అన్నారు. తెలంగాణకు చెందిన వలస కూలీలు గుంటూరు జిల్లా ప్రత్తిపాడుతోపాటు ఇతర ప్రాంతాల్లో ఉన్నారని తెలిపారు.

తెలంగాణకు చెందిన వలస కూలీలను తీసుకెళ్లాలని ఆ ప్రభుత్వానికి చెప్పినా స్పందించడం లేదని హోంమంత్రి సుచరిత అన్నారు. వేరే రాష్ట్రాల్లో ఉన్న మన రాష్ట్ర కూలీలను ప్రత్యేక వాహనాలలో తీసుకువస్తున్నామని చెప్పారు. ప్రతి 50 కిలోమీటర్లకు ఒక వసతి కేంద్రాన్ని ఏర్పాటు చేయాలని సీఎం జగన్ మోహన్ రెడ్డి ఆదేశించారని.. అందుకు ఏర్పాట్లు జరుగుతున్నాయన్నారు.

వేరే రాష్ట్రాల వారు ఇబ్బంది పడకుండా మన రాష్ట్రం దాటే వరకు వసతి కేంద్రం దగ్గర భోజనం వసతి కల్పిస్తున్నట్లు తెలిపారు. తెలంగాణ ప్రభుత్వం స్పందించి వారి రాష్ట్ర కూలీలను తీసుకెళ్తామంటే తక్షణం ఏర్పాట్లు చేస్తామని హోంమంత్రి స్పష్టం చేశారు.

ఇదీ చదవండి: మోదీ సర్కార్ వీసా రూల్స్​పై ప్రవాసీల అసంతృప్తి