Ap Special Express Train Ac Problem: రైల్వే శాఖ నిర్లక్ష్యం ప్రయాణీకుల సహనానికి పరీక్ష పెడుతోంది. సికింద్రాబాద్ నుంచి విశాఖకు వచ్చే స్పెషల్ ఎక్స్ప్రెస్ రైలులో ఏసీలు పనిచేయలేదు. అసలే ఎండాకాలం కావటంతో ప్రయాణికుల అవస్థలు వర్ణనాతీతమయ్యాయి. గాలి ఆడక పసిపిల్లలు, వృద్దులు అల్లాడిపోయారు. విజయవాడ స్టేషన్లో విధుల్లో ఉన్న ట్రాఫిక్ అధికారులు, టెక్నికల్ అధికారుల దృష్టికి తమ సమస్యను తీసుకునివచ్చినా పరిష్కారం మాత్రం లభించట్లేదని ప్రయాణికులు ఆగ్రహం వ్యక్తం చేశారు. అధికారులు ఎవరూ తమ సమస్యపై స్పందించలేదని ప్రయాణికులు ఆవేదన వ్యక్తం చేశారు.
సాయంత్రం సికింద్రాబాద్లో బయలుదేరిన దగ్గర నుంచి ఈ సూపర్ ఫాస్ట్ ఏసీ స్పెషల్ ఎక్స్ప్రెస్లో పలు భోగిల్లో ఏసీ పనిచేయక ఉక్కపోతతో ఊపిరి ఆడక నానా అవస్థలకు గురయ్యారు. చంటి పిల్లలతో సైతం డోర్ వద్ద రాత్రంతా కాలక్షేపం చేయాల్సి వచ్చింది. పరిమితంగా స్టాపులు ఉండడం వల్ల ఏసీ భోగిలో సౌకర్యంగా ప్రయాణం చేయాలనుకున్న ప్రయాణికులకు ఎదురైన ఈ చేదు అనుభవంపై మండిపడుతున్నారు. అధికారులకు ఎస్ఎంఎస్, వీడియోలు పంపించటం ద్వారా సమాచారం ఇచ్చినా.. ప్రత్యక్షంగా స్టేషన్లోని అధికారులుతో చెప్పినా ఫలితం లేకపోవడం వారిని మరింతగా ఆగ్రహాన్ని గురిచేసింది. ఈ రైలు నిన్న రాత్రి సికింద్రాబాద్లో బయలుదేరి ఉదయం విశాఖ చేరుకునే వరకు ఇదే పరిస్థితి కొనసాగిందని ప్రయాణికులు ఆవేదన వ్యక్తం చేస్తున్నారు.
ఇటీవల ఓ ఎక్స్ప్రెస్లో కూడా ఇలాంటి ఘటనే జరిగింది. సికింద్రాబాద్ నుంచి షాలిమార్కు వెళ్తున్న ఎక్స్ప్రెస్ రైలులో ఏసీ పనిచేయలేదు. దీంతో ప్రయాణికులు ఉక్కిరిబిక్కిరి అయ్యారు. సుమారు 8 గంటల నుంచి రైలులో ఏసీ పనిచేయట్లేదని ప్రయాణికులు రైల్వే అధికారులకు ఫిర్యాదు చేశారు. అయినా అధికారులు మాత్రం స్పందించపోవటంతో విసుగెత్తిపోయిన ప్రయాణికులు ఒక్కసారిగా ఆందోళనకు దిగారు. ఈ క్రమంలో విజయనగరం రైల్వేస్టేషన్లో గంటపాటు రైలును ఆపేసి.. ఇంజన్ కదలకుండా ముందు అడ్డుగా నిలబడి ప్రయాణికులు నిరసన వ్యక్తం చేశారు. దీంతో రైల్వే అధికారులు దిగొచ్చి రైలులో మరమ్మతులు నిర్వహించి ఏసీని పునరుద్దరించారు. దీంతో గంటన్నర తర్వాత షాలిమర్ ఎక్స్ప్రెస్ విజయనగరం రైల్వే స్టేషన్ నుంచి కదిలింది. ప్రయాణికుల సమస్య పరిష్కారం కావటంతో ప్రయాణికులు ఊపిరి పీల్చుకున్నారు. అయితే తమ సమస్యపై పలుమార్లు అధికారులకు ఫిర్యాదు చేసినా స్పందించకపోవటంపై ప్రయాణికులు తీవ్ర విచారం వ్యక్తం చేశారు.
