చెత్త సేకరణ వృత్తిదారులకు తప్పని పాట్లు

మనం అవతల పడేసే చిత్తు కాగితాలు, తుప్పుపట్టిన ఇనుప వస్తువులు, పాడైపోయిన ప్లాస్టిక్ సామాన్లు.. ఇవి ఎంతోమందికి జీవనోపాధిని అందిస్తున్నాయి. చిరిగిన దుస్తులతో.. చెత్తను ఏరుకుంటూ మనకు నిత్యం కనిపించే ఈ అభాగ్యులకూ లాక్​డౌన్ కష్టాలు తప్పలేదు. మూడు నెలలపాటు ఉపాధి లేక ఆకలితో అలమటించేవారు కొందరైతే... తుక్కు వ్యాపారాన్ని నమ్ముకుని నష్టాలపాలైన దుకాణదారులదీ అదే దుస్థితి. గుంటూరు జిల్లాలో చెత్త సేకరణ వృత్తిదారుల దుస్థితిపై ఈటీవీ భారత్ ప్రత్యేక కథనం.

కరోనా అన్ని రంగాలను.. అన్ని వర్గాలను కుదిపేస్తోంది. చెత్త, వ్యర్థాలను సేకరించి పొట్ట పోసుకునే నిరుపేదల పరిస్థితి మరింత దయనీయం. ప్లాస్టిక్ బాటిళ్లు, అట్టపెట్టెలు, చిత్తు కాగితాలు, పనికిరాని ఇనుప సామాగ్రిని... అవే మహాభాగ్యంగా భావిస్తారీ అభాగ్యులు. కష్టపడి సేకరించే వస్తువుల్ని కిలోల చొప్పున తుక్కు వ్యాపారులకు అమ్ముతుంటారు.

చెత్తగా బతుకీడిస్తున్నారు..

అసంఘటిత రంగంలో వేలాదిమంది చెత్త సేకరణ వృత్తిపై ఆధారపడి జీవిస్తున్నారు. చెత్త సేకరించే వారిలో మూడొంతులమంది నిరక్షరాస్యులే. తల్లిదండ్రుల నుంచి వచ్చిన ఈ వృత్తిని తప్పనిసరి పరిస్థితుల్లో ఆచరించాల్సిన పరిస్థితి ఏర్పడింది. రోడ్లపక్కన గుడారాలు వేసుకుని వీరంతా బతుకీడుస్తున్నారు. రోజంతా చెత్తను సేకరిస్తే వారికి మిగిలేది రెండుపూటలా భోజనమే. లాక్​డౌన్ వల్ల కొందరు అప్పులు చేసి మరీ ఆకలిమంట తీర్చుకుంటున్నారు.

చెత్తను ముట్టుకుంటే భయం..

లాక్​డౌన్ మూలంగా తుక్కుసామాగ్రి సేకరించే దుకాణదారులు సైతం ఉపాధి కోల్పోయారు. ఆంక్షలకు తోడు చెత్తను ముట్టుకుంటే ఏమైనా అవుతుందేమోనని భయంతో కూలీలు ఎవరూ ఆ జోలికే పోలేదు. ఫలితంగా చెత్త సేకరణ, తుక్కు వ్యాపారం పూర్తిగా స్తంభించిపోయింది.

భారమైన పోషణ...

గుంటూరు జిల్లాలో పలువురు దుకాణదారులు ఈ వృత్తిపై ఆధారపడి పొట్ట పోసుకుంటున్నారు. ఇప్పుడందరూ ఇళ్లకే పరిమితమయ్యారు. 3 నెలలపాటు దుకాణాలు తెరవకపోవడంతో అద్దెలు చెల్లించలేని పరిస్థితి ఏర్పడింది. కుటుంబ పోషణ భారంగా మారింది. కొందరైతే అప్పులు చేసి మరీ కుటుంబాలను నెట్టుకొస్తున్నారు. ఇప్పుడిప్పుడే బిక్కుబిక్కుమంటూ దుకాణాలు తెరుస్తున్నా... భవిష్యత్తు ఎలా ఉంటుందోనన్న బెంగ వారిని వీడటం లేదు.

ఇదీ చూడండి. సవతితల్లి ప్రతాపం... కొడుకు , భర్తకు గాయాలు...