ఆంధ్రా అభివృద్ధికి కేసీఆర్ అడ్డు!

ఆంధ్రా అభివృద్ధికి తెలంగాణ ముఖ్యమంత్రి కేసీఆర్ అన్ని విధాలా అడ్డుపడుతున్నారని ఎంపీ గల్లా జయదేవ్ ఆరోపించారు. ప్రత్యేక హోదా విషయంలో తెరాస అధినేత చెప్పేదొకటి.. చేసేదొకటని విమర్శించారు. మోదీకి లాభం చేసేందుకే తెలంగాణలో ముందస్తు ఎన్నికలకు వెళ్లారని... ఇప్పుడు ఏపీలో జగన్​తో చేతులు కలిపి కుట్రలు చేస్తున్నారని అన్నారు.

గుంటూరు తూర్పు నియోజకవర్గ నేతలతో సమావేశంలో.. తెలంగాణ ముఖ్యమంత్రికేసీఆర్​పై ఎంపీ గల్లా జయదేవ్ విమర్శలు గుప్పించారు. పోలవరం నుంచి ప్రత్యేక హోదా వరకు అన్ని విషయాల్లో ఏపీ అభివృద్ధిని కేసీఆర్ అడ్డుకుంటున్నారని ఆరోపించారు. భాజపా, తెరాస సంబంధం బయటకు రాకూడదనే ముందస్తు ఎన్నికలకు వెళ్లారని అభిప్రాయపడ్డారు. ఇప్పుడు రాష్ట్రంలో జగన్​తో చేతులు కలిపి కుట్రలు పన్నుతున్నారని విమర్శించారు. సొంత ప్రయోజనాలకే మోదీతో జగన్​, కేసీఆర్ లాలూచీ పడ్డారన్నారు. జైలుకు పోతామనే భయంతోనే ఇప్పటి వరకు మోదీపై జగన్ ఒక్క విమర్శ కూడా చేయలేదని ఎద్దేవా చేశారు.