కర్బన ఉద్గారాలతో కాలుష్యం కోరలు చాస్తుంది. ఈ పరిణామాలను ఎదుర్కొనేందుకు ప్రభుత్వాలు సంసిద్ధమవుతున్నాయి. కాలుష్య నియంత్రణలో ఏపీ మరో ముందడుగు వేసింది. రాష్ట్రంలోని అన్ని ప్రభుత్వ శాఖలకు విద్యుచ్ఛక్తితో నడిచే కార్లు ఇస్తోంది. 4 వేల కార్లు కొనుగోలు చేసేందుకు నెడ్ క్యాప్, ఈఈఎస్ఎల్ సంస్థలతో రాష్ట్రం పరోక్ష ఒప్పందం కుదుర్చుకుంది.
దేశవ్యాప్తంగా పదివేల విద్యుత్ కార్లు అందించేందుకు ఈఈఎస్ఎల్ సంస్థ ప్రణాళికలు చేసింది. వాటిల్లో ఏపీకి 4వేల కార్లు రానున్నాయి. ఒక్కో కారుకు నెలకు రూ.20 వేలు అద్దె చెల్లించేందుకు రాష్ట్రం అంగీకరించింది.
ఈ నిర్ణయంతో ప్రభుత్వ శాఖలకు అద్దె వాహనాల బెడదపోనుంది. ఇప్పుడు ఉపయోగించే వాహనాలకు నెలకు రూ. 30 నుంచి 35 వేలు అద్దె చెల్లిస్తున్నారు. అద్దె ఎక్కువ సమస్యకాగా... వాహనాల కొరత ఉందనే ఉంది. విద్యుత్ వాహనాల రాకతో ఈ సమస్యను అధిగమించవచ్చంటున్నారు అధికారులు. ప్రభుత్వ శాఖలు ప్రతినెలా రూ.20 వేల చొప్పున 6 ఏళ్లు అద్దె చెల్లిస్తే కారు ఆ శాఖ సొంతమవుతుంది. ఈ కార్లను మహీంద్రా, టాటా తయారీ కంపెనీల నుంచి ఈఈఎస్ఎల్ కొనుగోలు చేస్తోంది. వాటిని నెడ్‌క్యాప్ ద్వారా అద్దెకిస్తుంది. వీటిని డ్రైలీజ్ విధానంలో వివిధ శాఖల అధికారులు వినియోగించడానికి జిల్లా కలెక్టర్లు ఆమోదం తెలిపారు.
ఒక విద్యుత్ కారు ఖరీదు సుమారు రూ.11.5 లక్షలు, ఛార్జింగ్ బ్యాటరీ రూ 5.5 లక్షలు. ఈ విద్యుత్ కార్లు శబ్ధ, వాయు కాలుష్యాలు కల్గించవు. కారును 2 పద్ధతుల్లో ఛార్జింగ్ చేసుకోవచ్చు. ప్రత్యేక సాంకేతిక పరిజ్ఞానంతో గంటన్నరలో ఛార్జింగ్ చేయొచ్చు. ప్రతి జిల్లాలోనూ జిల్లాలో ఛార్జింగ్ స్టేషన్లు ఏర్పాటుచేశారు. ఒక్కసారి బ్యాటరీని ఛార్జింగ్ చేస్తే 110 కిలోమీటర్లు ప్రయాణించవచ్చని ఈఈఎస్ఎల్ సంస్థ అధికారులు చెబుతున్నారు.
విద్యుత్ కార్ల పనితీరు ఆశాజనకంగా ఉంటే భవిష్యత్లో ప్రభుత్వ కార్యాలయాలన్నింటికీ పంపిణీ చేయాలని సీఎం చంద్రబాబు భావిస్తున్నారు. అనంతపురంలో ఏర్పాటైన కియా విద్యుత్ కార్లు అందుబాటులోకి వస్తే రాష్ట్రంలో కాలుష్యం తగ్గుతుందనంటున్నారు.
