తూర్పుగోదావరి జిల్లా యు.కొత్తపల్లి మండలం తీర ప్రాంత గ్రామాల్లో కాకినాడ ఎంపీ గీత, జిల్లా పాలనాధికారి మురళీధర్ రెడ్డి పర్యటించారు. తుఫాన్ ప్రభావంతో కోతకు గురైన ఉప్పాడ, సూరాడపేట, మాయాపట్నం తదితర గ్రామాల్లో పర్యటించారు. అనంతరం సముద్ర కోత ప్రభావాన్ని పరిశీలించారు. కోత ప్రభావం కారణంగా నివాసాలు కోల్పోయిన బాధితులు పునరావాస కేంద్రంలో ఉండగా వారి వద్దకు వెళ్లి పరామర్శించారు.
అందరికీ ఇళ్ల స్థలాలు..
ఇల్లు కోల్పోయిన అందరికీ ఇళ్ల స్థలాలు కేటాయించి పక్కా ఇల్లు నిర్మిస్తామని కలెక్టర్ హామీ ఇచ్చారు. ప్రభావిత ప్రాంతాల్లో ఉన్న ప్రజలు అధికారులకు సహకరించాలని కోరారు. కోత నివారణకు రక్షణ కల్పించేందుకు ఇటీవలే కేంద్ర బృందంతో పర్యటించి ప్రణాళిక సిద్ధం చేశామని ఎంపీ గీత పేర్కొన్నారు. ఇందుకు సంబంధిత ఫైలు ప్రధాని దగ్గర ఉందన్నారు. ఆయన పరిశీలన అనంతరం త్వరలోనే శాశ్వత పరిష్కారం జరుగుతుందని హామీ ఇచ్చారు.
