పేదలకు పట్టాలు ఇవ్వాలని రైతు కూలీ సంఘం నిరసన

తూర్పుగోదావరి జిల్లాలో పేదలు ఏళ్ల తరబడి సాగు చేసుకుంటున్న భూములకు పట్టాలు ఇవ్వాలని డిమాండ్ చేస్తూ జగ్గంపేట తహసీల్దార్ కార్యాలయం ఎదుట రైతుకూలీ సంఘం సభ్యులు, నాయకులు ధర్నాకు దిగారు. పేదలకు ఈ భూమి వచ్చే విధంగా పట్టాలు మంజూరు చేయాలంటూ అధికారులకు సంఘం సభ్యులు వినతి పత్రం అందజేశారు.

తూర్పుగోదావరి జిల్లా జగ్గంపేట మండలం రాజపూడి గ్రామాల్లో సర్వే నెంబర్ 474లో సుమారు 15 ఎకరాల 61 సెంట్ల భూమిని 12 సంవత్సరాలకు పైబడి నిరుపేదలు సాగు చేసుకొంటున్నారని, ఆ భూమి ఎప్పటినుంచో వారి ఆధీనంలోనే ఉందని రైతుకూలీ సంఘం నాయకులు తెలిపారు. సాగు చేసుకుంటున్న భూమికి పట్టాలు ఇప్పించాలని పలుమార్లు జగ్గంపేట తహసీల్దార్, జిల్లా కలెక్టర్ కార్యాలయం చుట్టూ తిరిగారని అన్నారు. అయితే రెవెన్యూ అధికారులు ఈ విషయంపై స్పందించడం లేదని రైతు కూలీ సంఘం ఉభయ గోదావరి జిల్లాల అధ్యక్షుడు బత్తుల అప్పలరాజు ఆవేదన వ్యక్తం చేశారు. పేదలకు ఈ భూమి వచ్చే విధంగా పట్టాలు మంజూరు చేయాలంటూ అధికారులకు సంఘం సభ్యులు వినతి పత్రం అందించారు. ఈ కార్యక్రమంలో అధిక సంఖ్యలో సంఘం సభ్యులు, మహిళలు పాల్గొన్నారు.

ఇవీ చూడండి... ఊరెళ్లి వచ్చేసరికి ఇల్లు దోచేశారు..!