'తుడా ఆదాయం పెంచేందుకు కసరత్తు'

​​​​​​​తిరుపతి నగరాభివృద్ధి సంస్థ ఆదాయాన్ని పెంచేందుకు యంత్రాంగం కసరత్తు చేస్తోంది. దేశం నలుమూలల నుంచి తితిదే నిర్వహణలో ఉచిత వైద్య సేవలు అందిస్తున్న బర్డ్‌, స్విమ్స్‌ ఆసుపత్రులకు రోగులు వస్తుంటారు. వారికి వీలుగా షెడ్ల నిర్మాణాలు చేపడుతోంది. స్పందన కార్యక్రమంలో వినతి పత్రాలు ఇచ్చేందుకు వచ్చే ప్రజలు వేచి ఉండటానికి గదులు నిర్మించాలని అధికారులు భావిస్తున్నారు.

తిరుపతి నగర శివార్లలో దశాబ్దాలుగా పరిష్కారం కాని శెట్టిపల్లె భూముల సమస్యను పరిష్కరించాలని అధికారులు భావిస్తున్నారు. అధునాతన టౌన్‌షిప్‌ నిర్మించడం ద్వారా ఆదాయ వనరులను సమకూర్చనున్నారు. శెట్టిపల్లె భూముల సమస్య పరిష్కారానికి గ్రామ రైతులు, ప్రజలతో తుడా సంప్రదింపులు చేస్తోంది. అన్‌ సెటిల్‌ భూములపై ప్రజలకు భూ హక్కులు కల్పించాలని ఆలోచిస్తోంది.

మిగిలిన భూములను రెవెన్యూ శాఖ స్వాధీనం చేసుకొని తుడాకు అప్పగించనుంది. ఆ భూముల్లో టౌన్‌ షిప్‌ అభివృద్ధి చేసేలా ప్రణాళికలు రూపొందించారు. మరో వైపు తుడా పరిధిలోని ఆరు మండలాలతోపాటు తిరుపతి నగరంలో పలు అభివృద్ధి కార్యక్రమాలు చేపట్టనున్నారు. ఇటీవల జరిగిన తుడా సర్వసభ్య సమావేశంలో పలు కీలక నిర్ణయాలు తీసుకున్నారు.

తితిదే నిర్వహణలో ఉన్న బర్డ్‌, స్విమ్స్‌ ఆసుపత్రుల్లో పచ్చదనం కోసం చర్యలు తీసుకుంటున్నారు. రోగుల సహాయకులు వేచి ఉండేందుకు షెడ్‌లు నిర్మించాలనే ఆలోచన చేస్తున్నారు. తుడా పరిధిలోని 6 మండలాల తహసీల్దారు, మండల అభివృద్ధి కార్యాలయాల వద్ద పనుల కోసం వచ్చే సామాన్య ప్రజలు వేచి ఉండేందుకు షెడ్లు నిర్మించనున్నారు.

ఆక్రమణలకు గురవుతున్న కోట్ల రూపాయల విలువ చేసే తుడా ఖాళీ భూములను గుర్తించి... బహిరంగ వేలం ద్వారా తుడా ఆదాయాన్ని సమకూర్చుకుంటోంది. పలు అభివృద్ధి కార్యక్రమాలు అమలు చేస్తోంది. మొక్కలు నాటేలా ప్రజలను ప్రోత్సహించడానికి పండ్ల మొక్కలతోపాటు... ఎర్రచందనం మొక్కలు పంపిణీ చేయనుంది.