చిత్తూరు జిల్లావ్యాప్తంగా ఏజెంట్ల చేతిలో దగా పడుతున్న మహిళలు ఎందరో! తమకు జరిగిన అన్యాయంపై గళమెత్తుతున్న వారు మాత్రం కొందరే. ఏజెంట్లు ఎక్కడ ఇబ్బంది పెడతారోనని భావించి ఎందరో లోలోన కుమిలిపోతున్నారు. కుటుంబ పరువు, ప్రతిష్ఠలు ఆలోచించి పోలీస్స్టేషన్కు రావడం లేదు. పశ్చిమ పల్లెల్లో వేల మంది బాధితులున్నా.. వేళ్ల మీద లెక్కించదగ్గ సంఖ్యలో పోలీసు కేసులు నమోదవుతున్నాయి.
ఉన్నది పదుల సంఖ్యలోనే కానీ...!
జిల్లాలో లైసెన్స్డ్ గల్ఫ్ ఏజెంట్లు పదుల సంఖ్యలో మాత్రమే ఉన్నారు. దీనిపై అధికారిక సమాచారం ఎక్కడా లేదు. ఎక్కువ మంది లైసెన్స్ లేకుండా.. వీసాల వ్యాపారం చేస్తున్నవారే. వీరు పశ్చిమ ప్రాంతంలోని కొన్ని గ్రామాల్లో తమ మనుషులను నియమించుకొని మహిళలను గల్ఫ్ దేశాలకు పంపుతున్నారు. ఒక్క పీలేరులోనే అనధికారికంగా 200 మంది ఏజెంట్లు, మదనపల్లె, కురబలకోట, తంబళ్లపల్లెలో వందల్లో ఉన్నారు.
నరకకూపంలోకి పంపుతున్న ఏజెంట్లు
దేశం కాని దేశం.. అక్కడో దౌత్య కార్యాలయం.. అందులో 45 మంది మహిళలు.. ఒక్కరి ముఖంలోనూ ఆనందంలేదు. వారి కళ్లముందే ఎంతోమంది భారతీయులు అక్కడికి వస్తున్నారు.. ఆనందంగా స్వదేశానికి వెళుతున్నారు.. వారు మాత్రం కొన్ని నెలలుగా అక్కడే తలదాచుకుంటున్నారు. స్వదేశానికి వెళ్లాలనే ఆశ వారిలోనూ ఉంది.. కన్నవారిని, కనిపెంచిన బిడ్డలను, కట్టుకున్న భర్తను చూడాలన్న కోరిక ఉంది. అయితే వారి దగ్గర పాస్పోర్ట్లు లేవు. ఇప్పుడు వారు ఆ గల్ఫ్ దేశంలో అక్రమ వలసదారులు. పాస్పోర్టులు గుంజుకొని.. తిట్టి, కొట్టి.. నానాహింసలు పెట్టింది సేట్లు కాగా.. వారిని తెలిసీ.. నరకకూపంలోకి పంపింది ఇక్కడి ఏజెంట్లు. ఒమన్, కువైట్, సౌదీ, యూఏఈ, బహ్రెయిన్ తదితర దేశాల్లోని భారతీయ రాయబార కార్యాలయాల్లో మగ్గుతున్న మహిళలెందరో గత కొద్ది రోజులుగా తమను ఇండియాకు పంపించాలంటూ ప్రభుత్వాలను మొరపెట్టుకుంటున్నారు. ‘ఈనాడు’ చిత్తూరు జిల్లా సంచికలో శనివారం ప్రచురితమైన ‘రాలిపోయిన మల్లికలెందరో.. రావాల్సిన రాధలెందరో’ కథనం చదివిన పాఠకులెందరో.. మదనపల్లె, పీలేరు, పుంగనూరు ప్రాంతంలోని గల్ఫ్ ఏజెంట్ల మోసాలను ‘ఈనాడు’తో పంచుకున్నారు. వందలాది మంది తెలిసీ తెలియక ఏడారి బాట పట్టారని.. ఎండమావుల్లో నీళ్లు చూపించి మోసగించిన ఏజెంట్లు మాత్రం ఇక్కడ దర్జాగా గడుపుతున్నారంటూ వాపోయారు.
అవసరాలను సొమ్ముగా చేసుకుంటున్నారు...
అసలే కరువు ప్రాంతం. సాగుబడి లేదు. చేతిలో పనిలేదు. సంసారం నెట్టుకురావాలంటే ఏదో బతుకుదెరువు వెతుక్కోక తప్పని పరిస్థితి. ఈ అవసరాన్నే సొమ్ము చేసుకుంటున్నారు మోసకారి గల్ఫ్ ఏజెంట్లు. అక్కడి దేశాల్లో ఇళ్లలో పనిమనుషులుగా, ఆయాలుగా చేరితే నెలకు రూ.20వేలు- రూ.25వేల జీతం ఇస్తారని నమ్మిస్తున్నారు. ఓ రెండేళ్లు అక్కడే పనిచేస్తే బిడ్డలను ఉన్నత చదువులు చదివించొచ్ఛు. ఘనంగా పెళ్లిల్లు చేయవచ్చు అంటూ ఆశ చూపుతున్నారు. బాగుపడిన ఒకరిద్దరి ఉదంతాలు చెప్పుకుంటూ వందల మంది ఎర వేస్తున్నారు. ఇష్టం లేకపోయినా.. నెలలపాటు ఇళ్ల చుట్టూ తిరిగి మరీ ఒప్పించి.. ఎడారి బాట పట్టిస్తున్నారు. వీసీ, విమానా ఛార్జీలు, ఇతర ఖర్చులకంటూ రూ.లక్షన్నర వరకూ తీసుకుంటున్నారు. డబ్బు చెల్లించి వీసా పొందిన మహిళలు తీరా విమానమెక్కి, సేటు ఇంట్లో చిత్రహింసలు అనుభవిస్తున్నామని చెప్పే సరికి ఏజెంట్ల పత్తా ఉండటంలేదు. ఇక్కడ మహిళల బంధువులు గట్టిగా మాట్లాడితే మీరే మాకు బాకీ ఉన్నారంటూ బెదిరిస్తున్నారు. పోలీసులకు ఫిర్యాదు చేస్తే కొన్నేళ్లపాటు దర్యాప్తు చేసి బాధితులకు రిక్తహస్తం చూపిస్తున్నారనే విమర్శలు ఉన్నాయి.
పర్యటక వీసా అంటకట్టి..
ఇంటి పని (డొమెస్టిక్ వర్కర్/ హౌస్ మేడ్) వృత్తుల్లో వెళ్లే వారి నుంచి ఏజెంట్లు రూ.1.5 లక్షలు- రూ.2 లక్షల వరకు వసూలు చేస్తుండగా.. వీరు ఆయా గల్ఫ్ దేశాల్లోని సేట్లకు చెల్లించేది రూ.50 వేల లోపే. పాస్పోర్ట్, వైద్య పరీక్షలు, స్టాంపింగ్, విమాన టిక్కెట్లు తదితర ఖర్చులు కలిపి మరో రూ.50 వేలు వెచ్చిస్తున్నారు. ఒక్కో వీసా ప్రాసెస్ చేయడానికి నికరంగా రూ.లక్ష వరకూ ఆర్జిస్తున్నారు. ఇటీవల పర్యాటక వీసా సంపాదించి.. హౌస్మేడ్ అంటూ గల్ఫ్కు పంపిస్తున్న ఘటనలు వెలుగు చూశాయి. వీరికి చెన్నై, బెంగళూరులో వైద్య పరీక్షలు చేయించాల్సి ఉండగా.. పీలేరులో వైద్య పరీక్షలు చేయించి, నకిలీ ఫిట్నెస్ పత్రాలు సంపాదిస్తున్నారు.
గుడ్డిగా నమ్మి..విమానమెక్కేస్తున్నారు..
గల్ఫ్ వెళ్లే మహిళల్లో ఎక్కువ మంది నిరక్షరాస్యులు కావడం, పర్యాటక వీసాలను కూడా అక్కడికి వెళ్లాక మార్చుకోవచ్చని ఏజెంట్లు భ్రమలు కల్పించడంతో వారు గుడ్డిగా నమ్మి.. విమానమెక్కేస్తున్నారు. వీసా గడువు ముగిసిన తర్వాత వారి కష్టాలు వర్ణనాతీతం. కొన్ని దేశాల్లో ఏజెంట్లు వెళ్లగానే పాస్ట్పోర్టు లాక్కొని మహిళలకు నరకం చూపిస్తున్నారు. ఇక్కడ ఏజెంట్లు రూ.20వేలు- రూ.25వేలు జీతం అని చెబుతుండగా.. అక్కడ ఇచ్చేది రూ.10వేలు- రూ.15వేలు మాత్రమే. ప్రాణాలతో తిరిగి స్వదేశానికి వెళ్లాలంటే వారు చెప్పినట్లు విని నడుచుకోవాల్సిన దుస్థితి. వీటిని భరించలేకే తాజాగా కొందరు మహిళలు మస్కట్లోని దౌత్య కార్యాలయానికి వెళ్లారు. పోలీసులు ఈ వ్యవహా రాన్ని ప్రత్యేకంగా పరిగణించి డ్రైవ్ చేస్తే తప్ఫ. ఈ అక్రమాలకు అడ్డుకట్ట పడే వీల్లేదు.
విదేశాంగశాఖతో మాట్లాడాం: ఎంపీ
మస్కట్లోని దౌత్య కార్యాలయంలో ఉన్న మహిళల గురించి విదేశాంగశాఖతో మాట్లాడామని ఎంపీ మిథున్రెడ్డి తెలిపారు. శనివారం ఆయన ‘ఈనాడు’తో మాట్లాడారు. ఇప్పటికే ఈ విషయమై విదేశాంగ శాఖను సంప్రదించామని, మరోసారి వారితో మాట్లాడతామన్నారు. మస్కట్ ఎంబసీలో ఉన్న మహిళల బంధువులతో మాట్లాడి.. పూర్తి వివరాలు తెలుసుకొని తదనంతరం అవసరమైన చర్యలు తీసుకుంటామని ఎంపీ పేర్కొన్నారు.
పీలేరుకు చెందిన ఓ ఏజెంట్పై గతంలో గల్ఫ్ మోసాలకు సంబంధించి కేసులు నమోదయ్యాయి. గతేడాది అక్టోబరులో ఇదే వ్యక్తి కడపకు చెందిన ఏజెంట్లతో కలసి పీలేరుకు చెందిన డిల్లీ రాణికి కువైట్లో ఉపాధి చూపిస్తానని చెప్ఫి. పర్యాటక వీసాపై ఒమన్కు పంపాడు. అక్కడి షేక్లు కొట్టి, తిట్టి, వేన్నీళ్లు ఒంటిపై పోసి చిత్రహింసలు పెట్టడంతో ప్రస్తుతం ఆమె మస్కట్ దౌత్య కార్యాలయంలో తలదాచుకుంటోంది.
ఇదీ చదవండి: