ఇప్పుడు రాజకీయం అంతా కోట్లలోనే..! అన్ని కోట్లుంటే కానీ నెగ్గే పరిస్థితి లేదన్న అభిప్రాయం రాజకీయ పార్టీల్లో వచ్చేసింది. ఎప్పిటి నుంచో రాజకీయాల్లో ఉండి.. ప్రజాభిమానం మెండుగా ఉన్న వారిని తప్పితే.. మిగతా చోట్ల అంతా పార్టీలు పైసలనే ముందు చూస్తున్నాయి. ఈ ఎన్నికల్లో ప్రధాన రాజకీయపార్టీల అభ్యర్థులు సమర్పించిన ఎన్నికల అఫిడవిట్లను చూస్తే... మన నేతలు ఇంత ధనవంతులా... అని ఆశ్చర్యపోవాల్సిందే. ముఖ్యంగా లోక్సభ బరిలో ఉన్న ప్రధాన పార్టీల అభ్యర్థుల ఆస్తులు వందల కోట్ల రూపాయలుండగా... అవే పార్టీల నుంచి బరిలో నిలిచిన కొంత మంది నేతల ఆస్తులు లక్షలకే పరిమితమయ్యాయి.
రాష్ట్రంలోని ప్రధాన లోక్సభ స్థానమైన విజయవాడ నుంచి బరిలోకి దిగిన వైకాపా అభ్యర్థి పొట్లూరి వరప్రసాద్ ఆస్తులు అధికంగా...రూ.347 కోట్ల 76 లక్షల 16వేల 325 ఉన్నట్లు ఎన్నికల అఫిడవిట్లో పేర్కొన్నారు. నర్సాపురం పార్లమెంట్ వైసీపీ అభ్యర్థి రఘురామకృష్ణంరాజు రూ.324 కోట్లతో రెండో స్థానంలో నిలిచారు. గుంటూరు నుంచి తెదేపా తరఫున పోటీ చేస్తున్న గల్లా జయదేవ్ రూ.305.14 కోట్లతో మూడో స్థానంలో ఉన్నారు.
ఈ ముగ్గురూ ఎక్కువ ఆస్తులున్న వారైతే... వైకాపా తరఫున అరకు నుంచి బరిలో నిలిచిన గొడ్డేటి మాధవి లక్షా 41 వేల 179 రూపాయల ఆస్తులున్నట్లు అఫిడవిట్లో పేర్కొని అత్యల్ప ఆస్తి ఉన్న అభ్యర్థిగా నిలిచింది. అధ్యధిక ఆస్తున్న మొదటి 10 మందిలో ఐదుగురు తెదేపా, ఐదుగురు వైకాపా అభ్యర్థులుండగా... అత్యల్ప ఆస్తున్న వారిలో ఐదుగురు వైకాపా, నలుగురు జనసేన, ఒకరు తెదేపా అభ్యర్థి ఉన్నారు. రాష్ట్రంలో అత్యధిక ఆస్తున్న పది మంది, అత్యల్ప ఆస్తున్న పది మంది ఎంపీ వివరాలు చూద్దాం.
అత్యధిక ఆస్తులున్న మొదటి 10 మంది ఎంపీ అభ్యర్థులు
| అభ్యర్థి | పార్టీ | స్థానం | కుటుంబ ఆస్తుల విలువ |
| పొట్లూరి వరప్రసాద్ | వైకాపా | విజయవాడ | 347,76,16,325 |
| రఘురామకృష్ణరాజు | వైకాపా | నర్సాపురం | 325,94,05,378 |
| గల్లా జయదేవ్ | తెదేపా | గుంటూరు | 305,14,85,242 |
| ఎం.శ్రీభరత్ | తెదేపా | విశాఖ | 230,27,34,188 |
| ఆదాల ప్రభాకర్రెడ్డి | వైకాపా | నెల్లూరు | 221,16,63,364 |
| డీ.ఏ.సత్యప్రభ | తెదేపా | రాజంపేట | 220,48,33,211 |
| ఎంవీ సత్యనారాయణ | వైకాపా | విశాఖ | 203,14,35,624 |
| బీద మస్తాన్రావు | తెదేపా | నెల్లూరు | 165,43,92,880 |
| వల్లభనేని బాలశౌరి | వైకాపా | మచిలీపట్నం | 99,05,75,840 |
| శిద్ధా రాఘవరావు | తెదేపా | ఒంగోలు | 91,65,36,770 |
అత్యల్ప ఆస్తులున్న మొదటి 10మంది ఎంపీ అభ్యర్థులు
| అభ్యర్థి | పార్టీ | స్థానం | కుటుంబ ఆస్తుల విలువ |
| గొడ్డేటి మాధవి | వైకాపా | అరకు | 1,41,179 |
| సయ్యద్ ముకరం | జనసేన | రాజంపేట | 15,00,000 |
| గోరంట్ల మాధవ్ | వైకాపా | హిందూపురం | 17,87,356 |
| వాంపురు గంగులయ్య | జనసేన | అరకు | 25,67,000 |
| నందిగం సురేష్ | వైకాపా | బాపట్ల | 33,13,807 |
| బుల్లి దుర్గాప్రసాద్రావు | వైకాపా | తిరుపతి | 40,79,254 |
| కోట్ల జయసూర్యప్రకాశ్రెడ్డి | తెదేపా | కర్నూలు | 1,14,12,674 |
| తలారి లింగయ్య | వైకాపా | అనంతపురం | 1,17,73,091 |
| ముక్కా శ్రీనివాసరావు | జనసేన | విజయనగరం | 1,34,28,596 |
| బెల్లంకొండ సాయిబాబు | జనసేన | ఒంగోలు | 1,38,66,783 |
