హోదా ఇవ్వాల్సిందే.. హామీ తీర్చాల్సిందే: మన్మోహన్

దిల్లీ ధర్మపోరాట దీక్షకు మాజీ ప్రధాని మన్మోహన్ సింగ్ మద్దతు తెలిపారు. పార్లమెంటు సాక్షిగా ఆంధ్రప్రదేశ్​కు ప్రత్యేక హోదా హామీ ఇచ్చారని స్పష్టం చేేశారు. కేంద్రం ఏపీ ప్రజల డిమాండ్​ను గౌరవించాలన్నారు.

రాష్ట్రంపై కేంద్రం నిర్లక్ష్యానికి నిరసనగా.. దిల్లీలో ముఖ్యమంత్రి చంద్రబాబు చేస్తున్న ధర్మపోరాట దీక్షకు మాజీ ప్రధాని మన్మోహన్​ సింగ్ సంఘీభావం తెలిపారు. ఆంధ్రప్రదేశ్ భవన్​కు వెళ్లి చంద్రబాబుతో కలిసి వేదికపై కూర్చున్నారు. పార్లమెంటు సాక్షిగా గతంలో ఆంధ్రప్రదేశ్​కు ఇచ్చిన హామీలను కేంద్రం అమలు చేయాల్సిందే అని స్పష్టం చేశారు. విభజన సమయంలో ఏపీకి హోదా ఇస్తామని హామీ ఇచ్చిన విషయాన్ని గుర్తు చేశారు. తనకు సమయం వచ్చినప్పుడల్లా ఈ విషయాన్ని పార్లమెంట్ వేదికగా ప్రస్తావిస్తున్నానని చెప్పారు. ఆంధ్రప్రదేశ్​కు ప్రత్యేక హోదా విషయంలో అన్ని పార్టీలు మద్దతు ఇచ్చిన విషయాన్ని నొక్కి చెప్పారు. కేంద్రం ఇప్పటికైనా ఆంధ్రప్రదేశ్ ప్రజల హక్కులను, డిమాండ్లను గౌరవించాలని కేంద్రానికి మన్మోహన్ హితవు పలికారు.