మామ గెలిచాడు... అల్లుళ్లు ఓడారు

రాష్ట్రంలో అంచనాలకు అందని ఫలితాలు వెలువడ్డాయి. ఈ ఎన్నికల ఫలితాలు కొందరికి మధుర జ్ఞాపకాలు పంచితే... మరికొందరికి జీవితకాలం గుర్తుండిపోయే చేదు అనుభవాన్ని మిగిల్చాయి. ఎందరో ప్రముఖలు గెలుపునకు దూరం కాగా... మరెందరో సామాన్యులు చట్టసభల్లో అడుగుపెట్టబోతున్నారు. రాష్ట్రవ్యాప్తంగా ఫలితాలు ఎలా ఉన్నా... నందమూరి కుటుంబానికి మాత్రం మిశ్రమ అనుభవాన్ని పంచాయి ఈ ఫలితాలు. పార్టీకి పట్టున్న స్థానాల్లో నందమూరి వారసులు నిలిచినా... నెగ్గలేకపోయారు. చంద్రబాబు, బాలయ్య పోటీ చేసిన స్థానాల్లో విజయం సాధించగా... లోకేశ్, భరత్ పరాజయం పాలయ్యారు.

ఈ సార్వత్రిక ఎన్నికలు నందమూరి అభిమానులకు కొంత సంతోషాన్ని.. మరికొంత విషాదాన్ని నింపాయి. అంచనాలు తారుమారు చేస్తూ తీర్పు ఇచ్చిన ఓటర్లు... చంద్రబాబు, బాలయ్యకు గెలుపు సంతోషం కన్నా... ఓటమి బాధ మిగిల్చారు. చంద్రబాబు సంగతి ఎలా ఉన్నా... బాలయ్య ఇద్దరు అల్లుళ్లు పరాజయం పొందడం నందమూరి అభిమానుల్లో బాధను పెంచింది. అనంతపురం జిల్లా హిందూపురం నుంచి బాలకృష్ణ గెలుపొందగా... రాజధాని ప్రాంతమైన మంగళగిరి నుంచి అసెంబ్లీకి పోటీ చేసిన నారా లోకేశ్ ఓడిపోయారు.

రెండో అల్లుడు భరత్ విశాఖ పార్లమెంటు స్థానానికి పోటీ చేసి పరాజయం పొందారు. కారణాలేవైనా... ఈ ఎన్నికలు నందమూరి ఇంట సంతోషం కన్నా... బాధనే మిగిల్చాయని అభిమానులు ఆవేదన వ్యక్తం చేస్తున్నారు. పొరపాట్లు గుర్తించి... ఇంకో అవకాశాన్ని చేజార్చుకోబోమని అభిమానులు చెబుతున్నారు.

ఇదీ చదవండీ...