మరో రెండు రోజుల్లో ఐపీఎల్ ప్రారంభమవుతోంది. రాయల్స్.. కింగ్స్.. రైజర్స్ అంటూ ఒకటే హడావుడి ఉంటుంది. కోహ్లీ, ధోనీ, రోహిత్ వంటి స్టార్ ఆటగాళ్లు మెరుపులు మెరిపిస్తారు. నెల రోజుల పాటు దేశమంతా క్రికెట్ ఫీవరే..! సరిగ్గా అదే రోజుల్లో.. అదే తీరులో.. రాష్ట్రంలోనూ రాజకీయ సందడి నెలకొంటోంది. ఎప్పుడూ సవాళ్లు, ప్రతిసవాళ్లు చేసుకునే ప్రధాన రాజకీయ పక్షాలు తెదేపా - వైకాపా.. మహా పోరుకు సిద్ధమయ్యాయి. ఐదేళ్లపాటు విజేత హోదాను నిలబెట్టుకోవడం కోసం హోరాహోరీ పోరుకు సిద్ధమయ్యాయి.
డిఫెండింగ్ చాంఫియన్ తెదేపా టైగర్స్ .. సీనియర్ కెప్టెన్ చంద్రబాబు నేతృత్వంలో మరోసారి బరిలోకి దిగింది. అచ్చొచ్చిన పిచ్ పైన అదరగొట్టేయాలని అనుకుంటోంది. ఇంకోవైపు వైకాపా వారియర్స్ తమ కెప్టెన్ జగన్ నేతృత్వంలో ఈసారి ఎలాగైనా విజేతగా నిలవాలని ఉవ్విళ్లూరుతోంది. ఈ టోర్నీలో మాత్రం ఆటగాళ్ల స్థానంలో నేతలుంటారు. బౌండరీలు, సిక్సర్లు బాదినట్టుగాతూటాల్లాంటి మాటలు.. హోరెత్తించే మోతలు ఉంటాయి.
హిట్టర్స్ అండ్ సీమర్స్...
క్రికెట్లోరంగంలోకి దిగే ప్రతి జట్టూ..టోర్నీని కైవసం చేసుకోవాలనుకుంటుంది. అందుకు తగ్గట్టే ఓపెనింగ్.. మిడిల్ అర్డర్... హిట్టర్స్తో పాటు కీలక సమయంలో వికెట్లు పడగొట్టేలా బంతులు వేసే బౌలర్లు కావాలి. కానీ.. ఏపీ పొలిటికల్ టోర్నీలో టార్గెట్ స్పష్టం. ఇక్కడ లక్ష్యం సీఎం కుర్చీని కొట్టడమే..! తెదేపా టీమ్లో కెప్టెన్ చంద్రబాబే అన్నీ..! అపార అనుభవం ఉన్న ఆయన అనేక క్షిష్టమైన మ్యాచులలో తన జట్టును గెలిపించారు. ఇప్పటికీ లాంగ్ ఇన్నింగ్స్లు ఆడే స్థిరమైన బాట్స్మెన్. ఎంతో సంయమనంగా ఉండే కెప్టెన్ అప్పుడప్పుడు దూకుడుగా వెళ్లడానికీ వెనకాడరు. ముందుచూపుతో వ్యూహాలు రచిస్తుంటారు. ప్రత్యర్థుల నుంచి వచ్చే బౌన్సర్లను తట్టుకుంటూ.. జట్టును నడిపిస్తున్నారు. ఆయనటీమ్లో మంత్రులు దేవినేని, సోమిరెడ్డి వంటి నైపుణ్యం కలిగిన బాట్స్మెన్ ఉన్నారు. కళా, యనమల వంటి వారు లేఖాస్త్రాలతో మిడిల్ ఆర్డర్లో జట్టు భారాన్ని మోస్తుంటే.. చింతమనేని ప్రభాకర్ లాంటివారు దూకుడు చూపిస్తుంటారు.కెప్టెన్ గైడెన్స్లో చెలరేగుతూ.. లోకేష్ లాంటి యువనేతలు ట్విటర్ పంచులతో పించ్ హిట్టర్లుగా రాణిస్తున్నారు. అచ్చెన్నాయుడు, పయ్యావుల కేశవ్, బుద్దావెంకన్న లాంటి బౌలర్లు ప్రత్యర్థులపై చెలరేగుతుంటారు.
వైకాపా వారియర్స్లో.. కెప్టెన్ జగనే ముఖ్యమైన ప్లేయర్. రాజకీయ అనుభవం తక్కువైనా తమ జట్టును అన్నీ తానై నడిపిస్తున్నారు. వైస్ కెప్టెన్లాంటివిజయసాయిరెడ్డి.. కెప్టెన్కు అండగా నిలుస్తుంటారు. అంబటి, చెవిరెడ్డి లాంటి పించ్ హిట్టర్లు.. మాటలతో మెరుపులు మెరిపిస్తుంటారు. బుగ్గన లాంటి బౌలర్లు ప్రత్యర్థులను కట్టడి చేయడానికి స్పిన్ మాయాజాలాన్ని ప్రదర్శిస్తుంటారు.
ఆట మొదలైంది
ఏపీ రాజకీయ క్షేత్రంలో ఇప్పటికే ఆట మొదలైపోయింది. మ్యాచ్ మొదలు కాగానే ఒక టీమ్ లో ఉన్న ఆటగాళ్లను ప్రత్యర్థులు క్యాచ్ చేయడం మొదలు పెట్టారు. ఒకరిద్దరు తాము పోటీ చేయబోమంటూ.. వికెట్లను గిరాటేసి "హిట్ వికెట్" అవుతున్నారు. చాలా మందికి ఈ రాజకీయ మైదానంలోకి ఆడాలనుకున్నా.. అవకాశం దక్కక..పెవిలియన్ నుంచే తమ వారిని ఉత్సాహపరుస్తున్నారు. ఎన్నికల కమిషన్ ఈ మ్యాచ్ కు అంపైరింగ్ చేస్తోంది.
